Publicacións

luns 16 de marzo de 2009

Promovida polo INORDE e a Vicerreitoría do campus

A guía "Roteiros culturais por Ourense" descubre ao camiñante a beleza da provincia

Composta por dez andainas de entre 17 e 26 quilómetros

Os directores do proxecto, José García-Calvo e María Beatriz Vaquero Os afeccionados ao sendeirismo contan a partir de agora cun novo libro de referencia para as súas rutas pola provincia de Ourense. Promovida por INORDE e a Vicerreitoría do campus e coa colaboración do Servizo de Deportes, presentouse este luns a guía Roteiros culturais por Ourense, un traballo realizado por José García-Calvo “Willy” e María Beatriz Vaquero Díaz. Este publicación nace coa finalidade de dar a coñecer a través de dez andainas de sendeirismo, aos estudantes e á cidadanía en xeral, a peculiar beleza que agocha a provincia.

mércores 4 de febreiro de 2009

Miguel Ángel Mirás e Estela Sánchez publicaron unha obra sobre o tema

Dous profesores vigueses crean o primeiro paquete informático dedicado exclusivamente á teoría de xogos

Ante o reto que supuña impartir un curso introdutorio sobre os xogos corporativos debido á cantidade de exemplos, debuxos, diagramas, táboas e gráficos necesarios para aclarar os seus conceptos básicos, os profesores Miguel Ángel Mirás Calvo e Estela Sánchez Rodríguez elaboraron a primeira libraría informática dedicada exclusivamente a esta teoría. Esta ferramenta ven a complementar as reflexións realizadas polos seus autores e reflíctense no libro Juegos cooperativos con utlidad transferible usando MATLAB: TUGlab.

xoves 22 de xaneiro de 2009

O 22,4% das estudantes de ESO afirma ter sufrido acoso sexual

A violencia nos centros de secundaria ten marca de xénero

Docentes vigueses publican un estudo pioneiro sobre violencia escolar con datos desgregados por sexo

A miúdo os medios de comunicación fanse eco de casos de violencia nas escolas, pero poucas veces temos a oportunidade de ter estudos específicos sobre a situación dos centros escolares na provincia de Pontevedra, sobre todo dende unha perspectiva de xénero . Para pór datos sobre a mesa, un equipo de investigación formado por profesoras e profesores da Universidade de Vigo, de Educación Primaria e Secundaria e profesionais da psicoloxía propúxose como obxectivo analizar este fenómeno nos centros de secundaria da provincia, examinando se a violencia ten marca de xénero.
As conclusións son claras: as condutas agresivas e a violencia, entendendo por tal condutas de intimidación, tiranización, illamento, ameaza e insultos sobre alguén que non é quen de se defender, son moi frecuentes nos centros de ESO e están claramente xeneralizadas, “se ben tampouco se trata de presentar os centros coma campos de batalla, pois sería dar unha visión catastrofista que non é a real”, sinala María M. Álvarez Lires, coordinadora do estudo “Trazos de xénero da violencia escolar no ámbito galego”.

mércores 14 de xaneiro de 2009

Un libro de Iván Sestay recupera a microtoponimia da parroquia de Coia

Cando a Praza da Industria era A Barxa de Abuíde

"Toponimia do Val do Fragoso" recolle máis de 300 nomes de lugares

Poucas son as persoas, incluso na parroquia de Coia, que saben que os xulgados de Vigo sitúanse no Campo do Galo, ou a Praza da Industria na Barxa de Abuíde ou que o estadio de Balaídos construíuse nos Campos de Balaído. Son topónimos descoñecidos pola maioría de veciños que tampouco saberían localizar nun mapa da parroquia lugares como a Aparicia, a Fonte da Burra, o Forno do Cal, o Con da Fosallaou ou o Mombón.
Sen embargo, o traballo de compilación realizado polo estudante de Filoloxía Galega da Universidade de Vigo Iván Sestay no libro Toponimia do Val do Fragoso.Coia, permite que Coia recupere a súa identidade parroquial tradicional.

venres 19 de decembro de 2008

O profesor Xosé Mahou coordina a primeira escolma de experiencias de éxito de e-goberno

A monografía inclúe exemplos de webs como a Axencia Tributaria ou o Concello de Vigo

A páxina web do Concello de Vigo recibe unha media de 160.000 visitas mensuais e está considerada por diferentes estudos coma un dos concellos que máis servizos electrónicos lles concede aos cidadáns. Este é un dos exemplos que se achega na publicación A administración electrónica desde unha perspectiva comparada, unha obra na que se reúnen múltiples experiencias de prácticas exitosas de goberno electrónico. Coordinado polo profesor Xosé Mahou, “a obra servirá de referencia para o mundo académico e da administración".

mércores 17 de decembro de 2008

Dentro do libro "Sector Agroalimentario. I+D+i, Servizos e Formación"

36 grupos de investigación da Universidade implicados no estudo dun sector estratéxico na comunidade galega

Unha publicación da OTRI, baixo a Vicerreitoría de Investigación

A Oficina de I+D da Universidade (OTRI) ven de publicar o libro Sector Agroalimentario. I+D+i, Servizos e Formación no que se recolle “a oferta, os estudos e os proxectos dos equipos de investigación que traballan neste sector”, explica Ángeles López, directora da Oficina I+D. Son un total de 36 grupos, dos ámbitos científico, tecnolóxico e xurídico-social, que ofrecen a posibilidade de colaborar con empresas e institucións dedicadas á agricultura, á gandeiría e aos alimentos. “O obxectivo do manual é poñer en contacto aos grupos con empresas do sector, facilitando así a colaboración entre ambos”, subliña José Jato, técnico da Unidade de Cultura Científica.

martes 16 de decembro de 2008

Editado polo Consello da Cultura Galega

Un estudo de tres docentes da Universidade analiza os índices do I+D+i galego

Obra de José Manuel García Vázquez, Albino Prada e María A. Quintás


Segundo os datos publicados polo Instituto Nacional de Estatística sobre as actividades de I+D no ano 2007, Galicia superou por primeira vez na súa historia o 1% do PIB en gasto de I+D cun 1,03%. Pero este dato, con todo ser moi positivo para a Comunidade Autónoma, require de múltiples lecturas e matizacións para acadar unha diagnose da investigación e a innovación atendendo a todos os indicadores. Esta análise é a que ofrecen os profesores José Manuel García Vázquez, Albino Prada e María A. Quinta no libro que hoxe presentaron baixo o título Territorios Innovadores. Diagnose dos índices de I+D+i en Galicia.

mércores 10 de decembro de 2008

Un libro da profesora Susana Rodríguez repasa o traballo lexicográfico da institución

A evolución ideolóxica da RAE, a través dos cambios nas definicións dos seus dicionarios

O estudo comprende o período que vai dende 1726 ata 2006

A evolución ideolóxica da Real Academia Española ao longo dos últimos séculos pode verse reflectida no cambio nas definicións de algunhas das palabras que se inclúen nos seus dicionarios. Baixo esta premisa, a profesora do Departamento de Lingua Española, Susana Rodríguez, fixo un estudo que percorre os últimos 300 anos da institución e que sae á rúa da man do Servizo de Publicacións. Baixo o título La realidad relativa, este libro afonda no traballo lexicográfico da RAE dende 1726 ata 2006 para comprender a evolución da lingua pero tamén os avances culturais que, a través dela, se manifestan.

venres 5 de decembro de 2008

Vantaxes da e-learning e emprego das TIC son algúns dos temas desta edición

Xa está na rede o cuarto número da Revista de Formación e Innovación Educativa

Baixo a dirección de Pedro Membiela

Seguindo na liña de contribuír á mellora educativa, dando a coñecer as innovacións e investigacións introducidas no ámbito da docencia universitaria e axudando á súa difusión, xa está dispoñible o cuarto número da Revista de Formación e Innovación Educativa Universitaria (REFIEDU). Co apoio da Vicerreitoría de Formación e Innovación Educativa da Universidade, esta revista científica, de periodicidade trimestral e de acceso libre e gratuito a través da rede, publica nesta edición un total de cinco artigos “de temática variada e con contribucións de universidades externas”, explica Pedro Membiela, editor da revista.

luns 1 de decembro de 2008

Os profesores recollen nunha obra as experiencias docentes máis innovadoras

O volume recolle 29 exemplos de iniciativas educativas novidosas

“Unha manifestación das cousas máis interesantes e innovadoras que están a facer os docentes da Universidade de Vigo”, así definiu Pedro Membiela, vicerreitor de Formación e Innovación Educativa o volume Prácticas educativas innovadoras na universidade, unha obra na que se recollen 29 experiencias que amosan iniciativas educativas novidosas en diferentes ámbitos e titulacións. Unha experiencia innovadora para ensinar e popularizar as matemáticas a través do teatro ou o uso de foros de discusión son algúns dos exemplos que se inclúen.
Reitoría | Campus Universitario | C.P. 36.310 Vigo (Pontevedra) | España | Tlf: +34 986 812 000 | informacion@uvigo.es            Accesibilidade | Mapa web | Aviso Legal