Publicacións

luns 19 de febreiro de 2018

O docente da Facultade de Filoloxía e Tradución é experto en literatura medieval española

O profesor Antonio Chas recompila por primeira vez nun libro os poemas de Álvaro de Cañizares

A obra amosa que a produción literaria do poeta é máis extensa do que se coñecía ata o de agora

Antonio Chas, especialista en literatura medieval, coa súa última publicación

Álvaro de Cañizares foi un dos moitos poetas da España do século XV que pasaron desapercibidos na historia, a pesar de que algunhas das súas obras aparecen no Cancioneiro de Baena e no Cancioneiro de Palacio, dous dos textos casteláns máis antigos que se conservan deste tipo de poesía. Agora, case seiscentos anos máis tarde, o profesor do Departamento de Literatura Española e Teoría da Literatura Antonio Chas, experto en literatura medieval española, publica o libro La poesía de Álvaro de Cañizares, no que edita e estuda todos os poemas deste autor que chegaron ata a actualidade.

venres 9 de febreiro de 2018

Nuns talleres desenvolvidos coa asociación Doa no marco do programa de voluntariado de BBAA

Un libro reúne as “illas íntimas” que persoas con enfermidades mentais articularon a través da arte

O alumno Ventura Pérez foi o responsable de impartir estes talleres centrados na pintura

Santiago Hermelo, Sócrates Pérez, Ventura Pérez, Loreto Blanco e Leopoldo Gutiérrez interviron nesta presentación

Xerar un “mapa cartográfico dun territorio imaxinado”, para a partires de aí, representar a través da pintura unha das paisaxes dese territorio e abordar, tamén desde a arte, a idea de illa no seu sentido máis amplo. Estes foron os puntos de partida dos dous talleres que o alumno de Belas Artes Ventura Pérez desenvolveu, nos anos 2013 e 2016, cos usuarios e usuarias do centro de rehabilitación no que a asociación Doa traballa en Cangas con persoas con enfermidades mentais. Os resultados desas experiencias reúnense en Illas, o libro que a asociación presentaba este venres na Casa das Campás.

luns 5 de febreiro de 2018

O segundo volume dos Cadernos de investigación de Filoloxía Galega recompila seis traballos

'Cumieira', o galego si ten quen lle escriba

A publicación aspira a consolidarse e a obter recoñecemento dentro do seu ámbito

Xosé A. Fernández Salgado, editor de Cumieira. Cadernos de investigación da nova Filoloxía Galega

Reunir e divulgar algúns dos máis destacados traballos na “lingua do fogar de Breogán” é o propósito de Cumieira. Cadernos de investigación da nova Filoloxía Galega, publicación de carácter anual do ámbito da lingüística e literatura, que edita o Departamento de Filoloxía Galega da Universidade de Vigo. O segundo número da publicación recolle un total de seis artigos de temáticas diferentes como é o amor cortés, a onomástica, as vangardas, a influencia do ensino na adquisición lingüística e a construción de dous corpus ao ámbito dos estudos lingüísticos e literarios e as competencias no idioma.

venres 2 de febreiro de 2018

O profesor de BBAA Carlos Tejo coordina xunto con Marta Pol unha publicación sobre esta disciplina

Seis reflexións teóricas sobre a arte que acontece

O libro ‘Lo que sucede’ reúne os ensaios de investigadores participantes no congreso ‘Fugas e Interferencias’

A portada do libro emula unha constelación para aludir á interrelación da performance con outras disciplinas

O carácter efémero da performance é un dos factores que contribúe á que sexa escasa a análise que, desde o ámbito académico, se realiza desta disciplina. Co propósito de “encher un baleiro que existe na reflexión teórica” respecto desta arte o profesor da Facultade de BBAA Carlos Tejo e a investigadora Marta Pol coordinan o libro Lo que sucede: reflexiones críticas en torno al arte de acción, un volume que reúne seis ensaios de académicos e artistas que buscan, como sinala Tejo, afondar “noutra tipoloxía de arte de acción que poida rachar os convencionalismos que existen na disciplina”.

xoves 1 de febreiro de 2018

Segundo un documento presentado este xoves polo Foro Económico

Galicia, en boa situación para afrontar os retos da dixitalización

O informe está asinado polo catedrático da Universidade de Vigo Domingo Docampo

Segundo un documento presentado este xoves polo Foro Económico de Galicia. Na imaxe: Domingo Docampo, Santiago Lago e Víctor del Canto

“Está Galicia, as súas xentes, as súas institucións, as súas empresas, no lugar que lle corresponde nesta aventura da dixitalización?” Co obxectivo responder a esta pregunta, o Foro Económico de Galicia vén de presentar o documento Diagnóstico actual e propostas de futuro para a dixitalización en Galicia, firmado polo catedrático da Universidade de Vigo Domingo Docampo. Na resposta a esta cuestión o autor destaca no informe como “Galicia semella non estar lonxe do lugar que lle corresponde, non hai ningún atranco debido á falta de infraestruturas que impida levar a cabo proxectos empresariais na sociedade dixital, e cada vez son máis os cidadáns que van a dispor de infraestruturas de rede de primeiro nivel”.  

martes 23 de xaneiro de 2018

Reedítase o libro do profesor Pedro Pablo Gutiérrez ‘Teoría y práctica de la publicidad impresa’

Un manual para abordar a publicidade impresa desde unha perspectiva académica e profesional

O volume aborda as diferentes fases do traballo nunha axencia

O profesor de CCSS e da Comunicación Pedro Pablo Gutiérrez

Abarcar nun volume todas as posibles formas de publicidade impresa e tamén aquelas outras que, aínda que non teñen na impresión o seu soporte principal, si parten das mesmas premisas de traballo foi o propósito co que o profesor da Facultade de Ciencias Sociais e da Comunicación Pedro Pablo Gutiérrez publicou en 2006 Teoría y práctica de la publicidad impresa. Doce anos despois e trala venda de 5000 exemplares, Gutiérrez vén de dar forma a unha terceira edición revisada e actualizada dun volume que, como sinala, naceu con “vocación académica e profesional”. 

luns 22 de xaneiro de 2018

Este luns presentouse 'Mujer, Política e Igualdad. De las palabras a los hechos'

Un libro e 23 especialistas para evidenciar a desigualdade de xénero no estado contemporáneo

A amplo panel de temas abordados na obra abrangue desde cuestións históricas a laborais

Este luns presentouse o libro 'Mujer, Política e Igualdad. De las palabras a los hechos'

Plasmar como a igualdade formal entre homes e mulleres non se traduce nunha igualdade real entre homes e mulleres para avanzar na súa consecución. Con este reto, este luns presentouse na Facultade de Dereito do campus de Ourense o libro electrónico Mujer, Política e Igualdad. De las palabras a los hechos. Nel recóllense as actas das XII Xornadas Sociedade e Dereito, celebradas neste mesmo centro do 28 de marzo ao 5 de abril de 2016 coa participación de 23 especialistas do ámbito político, social, cultural e académico. 

xoves 18 de xaneiro de 2018

Unha publicación recolle a tese de doutoramento de Isaura das Dores Gomes de Sousa

Os “encantos” da lingua portuguesa e do seu ensino, en 1000 páxinas

A mestra xa xubilada explica a súa experiencia aplicando unha metodoloxía renovadora nas aulas

A obra recolle a tese de doutoramento de Isaura das Dores Gomes de Sousa

Encantos de uma Língua Falada e Escrita. Um Projecto de Investigação-Acção para o Ensino da Língua Portuguesa. Con este título vén de saír do prelo un libro no que a mestra xa xubilada Isaura das Dores Gomes de Sousa dá a coñecer ao público interesado a súa tese de doutoramento, presentada no ano 2009 na Facultade de Ciencias da Educación do campus de Ourense.  Os dous tomos que conforman a publicación son o froito da traxectoria persoal e profesional da autora ao longo de 46 anos de docencia.

luns 15 de xaneiro de 2018

Principal vehículo de expresión dos estudos sobre lingua e literatura española no sur de Galicia

Filoloxía e Tradución celebra o 20 aniversario da revista 'Hesperia'

A publicación inicia unha nova etapa na que se irá abandonando progresivamente o papel

José Montero, Susana Rodríguez e Antonio Rifón cós últimos exemplares da revista

A Facultade de Filoloxía e Tradución celebra este ano o 20 aniversario da revista Hesperia, principal vehículo de expresión dos estudos sobre lingua e literatura española no sur de Galicia. Nacida no seno do extinto Departamento de Filoloxía Española e dirixida polo catedrático José Montero Reguera a publicación inicia agora unha nova etapa na que, en consonancia coas tendencias actuais, irá abandonando progresivamente o papel e converterase nunha publicación dentro do sistema OJS (Open Journal System) incorporada ao portal de revistas dixitais da Universidade de Vigo.

mércores 10 de xaneiro de 2018

O catedrático Carlos Lago afonda no libro ‘Cortita y al pie’ na faceta pedagóxica destes profesionais

40 consellos para mellorar as capacidades dos adestradores de fútbol

A publicación presenta unha serie de estratexias para trasladar coñecementos nas sesións preparatorias

O investigador de Ciencias da Educación e do Deporte Carlos Lago

Máis aló dun coñecemento profundo da disciplina, no labor dun adestrador de fútbol resulta clave saber como trasladar os seus coñecementos de forma axeitada aos e ás deportistas, como e cando corrixir determinados comportamentos ou como xestionar posibles conflitos. “Invístese moito tempo en analizar aspectos tácticos do xogo e moi pouco en saber como trasladar esa información aos xogadores”, sinala  o catedrático Carlos Lago, quen no seu novo libro Cortita y al pie reúne 40 consellos dirixidos a adestradores e adestradoras, tanto de categorías de formación como profesionais.

Reitoría | Campus Universitario | C.P. 36.310 Vigo (Pontevedra) | España | Tlf: +34 986 812 000 | informacion@uvigo.es            Accesibilidade | Mapa web | Aviso Legal