Institucional

venres 13 de abril de 2018

Así o anunciou o vicerreitor alemán durante a clausura da International Week

A Universidade de Bremerhaven convida a un estudante de Ciencias Empresariais e Turismo á súa escola internacional de verán

A iniciativa ten como obxectivo continuar estreitando os lazos entre as dúas institucións

Así o anunciou o vicerreitor alemán durante a clausura da International Week. Na imaxe con Elena Rivo e Elena de Prada

Desde o luns 9 de abril a Facultade de Ciencias Empresariais e Turismo do campus de Ourense celebrou a súa xa tradicional International Week, que permite ao seu alumnado compartir actividades académicas e lúdicas con estudantes e profesorado estranxeiro. Despois dun intenso programa académico e lúdico, a cita pechouse este venres coa entrega por parte da Universidade de Bremerhaven ao centro ourensán dunha bolsa para que un dos seus estudantes asista de balde á escola internacional de verán da institución académica alemá.  

xoves 12 de abril de 2018

Emilio Fernández e Pachi Reigosa confrontaron durante máis dúas horas a súa idea de universidade

Os candidatos a reitor piden o voto para gañar o futuro e mudar as cousas

Os líderes de Ideas que suman e H2040 encheron, no seu segundo debate, a sala I de Miralles

Os líderes de Ideas que suman e H2040 encheron, no seu segundo debate, a sala I de Miralles

Tras dúas horas nas que debullaron boa parte dos seus respectivos programas electorais e responderon ás preguntas das e dos asistentes ao segundo debate que esta tarde protagonizaron na sala I do Edificio Miralles, os candidatos a reitor da Universidade de Vigo, Emilio Fernández e Pachi Reigosa, resumiron en pouco máis dun minuto as aspiracións coas que concorren á cita electoral do vindeiro 23 de abril. “Queremos ser o motor de Galicia. Unha universidade que se proxecte cara ao mundo, internacional e con investigación especializada. Necesitamos ilusión e ambición para gañar o futuro e nós temos esa ambición e esa ilusión”, asegurou Emilio Fernández, mentres que Pachi Reigosa rematou a súa intervención sinalando que “quero que nos concedades a vosa confianza para mudar as cousas. Queremos unha universidade de primeira, pero tamén das persoas. Unha universidade participativa na que se escoite a voz de todos. Queremos o cambio. Votádenos”.

xoves 12 de abril de 2018

Salustiano Mato e Jesús Vázquez asinaron este xoves o acordo do seu financiamento

Universidade e Concello de Ourense poñen en marcha o convenio para o desenvolvemento da Miteu

A Mostra Internacional de Teatro Universitario de Ourense celébrase do 12 ao 28 de abril

Salustiano Mato e Jesús Vázquez asinaron este xoves o acordo do seu financiamento. Na imaxe con Belén Iglesias e Fina Calleja

Do 12 ao 28 de abril, os escenarios da cidade de Ourense volverán levantar o seu pano para acoller unha nova edición, a 23, da Miteu, a Mostra Internacional de Teatro Universitario de Ourense. Este xoves, Salustiano Mato, reitor da Universidade de Vigo, e Jesús Vázquez, alcalde de Ourense, asinaron o convenio de colaboración entre as dúas institucións para o desenvolvemento desta cita, que contará coa participación de 28 grupos, 15 deles aulas universitarias e os restantes de carácter profesional, procedentes de sete países.  

xoves 12 de abril de 2018

O vindeiro luns 16 arrinca unha semana de actividades articulada en torno ao proxecto Crea S2i

Preto de 20 actividades para pór en valor a creatividade e a innovación

O programa abrangue conferencias, exposicións, obradoiros e sesións de traballo para PDI

O luns 16 dá comezo unha nova edición da Semana Internacional da Creatividade e da Innovación

Conferencias, obradoiros, música e cinema, exposicións e sesións de traballo dirixidas ao persoal docente e investigador, a Semana Internacional da Creatividade e da Innovación, que se desenvolverá a partires do vindeiro luns, reúne no seu programa preto de 20 actividades que teñen como nexo a posta en valor dos dous piares do proxecto de especialización Campus Crea S2i, a creatividade e a innovación social e sustentable. Promovida pola Vicerreitoría do campus coa colaboración das diferentes facultades e escolas, esta semana busca pór en valor a multiplicidade de titulacións e ámbitos de estudo que se reúne no campus.

mércores 11 de abril de 2018

O campus de Vigo acollerá o día 18 deste mes a xornada PrevenT

Universidade e Injuve apostan pola prevención para mellorar a saúde e os hábitos de vida

Con mesas redondas e obradoiros sobre alimentación, deporte e factores cardiovasculares de risco

Ignacio López-Chaves, Manuel Fernández, Javier Dorado e José Luís Núñez

Prevención fronte a curación. Esa é a esencia do programa PrevenT, unha iniciativa para a promoción de hábitos de vida en persoas novas e a prevención da enfermidade cardiovascular dende as primeiras etapas da vida organizada polo Instituto de la Juventud (Injuve) e a Universidade de Vigo. O evento, presentado este mércores no edificio Cambón, desenvolverase no campus de Vigo o vindeiro día 18 deste mes.

martes 10 de abril de 2018

Emilio Fernández e Pachi Reigosa confrontaron neste campus os seus modelos de Universidade

Ourense acolleu o primeiro debate entre as candidaturas á Reitoría

A iniciativa repetirase os vindeiros días en Vigo e Pontevedra

No debate participaron os candidatos á Reitoría e á Vicerreitoría do campus de Ourense

O campus de Ourense acolleu este martes o primeiro debate entre as candidaturas á Reitoría que concorren ás eleccións do 23 de abril. Emilio Fernández, encabezando Ideas que Suman, e Pachi Reigosa, liderando Horizonte 2040, confrontaron ante os membros da comunidade universitaria presentes, e os que seguiron o debate por Internet, os modelos de universidade que propoñen cada un deles. Con eles estiveron tamén as persoas elixidas por cada un dos equipos para asumir a Vicerreitoría do Campus de Ourense en caso de ser elixidos, como son os profesores da Facultade de Ciencias María Esther de Blas, por Horizonte 2040, e Javier Rodríguez Rajo, por Ideas que Suman.  

venres 6 de abril de 2018

Manuel Castro-Gil, PAS da Xunta desde 2001, defende os cadros de persoal estables

Ideas que suman presenta un xerente que ofrece diálogo e avoga por maximizar recursos e integrar servizos

Manuel Castro-Gil, PAS da Xunta desde 2001, defende os cadros de persoal estables

Manuel Castro-Gil e Emilio Fernández

“Son funcionario, experto en organización e non traballo con estruturas moi complexas, como moito un vicexerente e o apoio da estrutura xa existente”. Con estas palabras presentouse este mediodía ante unha representación do PAS da Universidade de Vigo Manuel Castro-Gil Amigo, a persoa elixida por Ideas que suman para ocupar a Xerencia. Veterinario con estudos complementarios en xestión e administración de empresas, Castro-Gil (Lugo, 1962), integrouse na administración da Xunta no ano 2001.

venres 6 de abril de 2018

O candidato a reitor, Pachi Reigosa, presentou o seu equipo e as liñas básicas do programa

H2040 estréase no campus de Vigo con actos en Filoloxía e Tradución e Económicas e Empresariais

Cunha aposta firme pola xestión dende o punto de vista dos recursos humanos

Un intre da intervención do candidato a reitor, Manuel Reigosa

O candidato a reitor de H2040, Pachi Reigosa, acompañado por parte do seu equipo, celebrou este venres os primeiros actos de campaña no campus de Vigo. O catedrático de Fisioloxía Vexetal mantivo unha xuntanza con representantes sindicais e posteriormente deu a coñecer o programa electoral e as e os candidatos para as vicerreitorías nas facultades de Filoloxía e Tradución e Económicas e Empresariais.

venres 6 de abril de 2018

O programa está liderado pola Universidade e a Confederación Empresarial de Ourense

O Proxecto b2i impulsará iniciativas de I+D en máis de 20 empresas

No desenvolvemento de cada idea participarán diferentes grupos de investigación

O programa está liderado pola Universidade e a Confederación Empresarial de Ourense

Este venres a Universidade de Vigo e a Confederación Empresarial de Ourense lanzaron o Proxecto b2i, un programa no que, en colaboración co Igape, búscase “impulsar iniciativas de investigación e desenvolvemento nos ámbitos da industria 4.0 e da economía circular”. Ao longo deste ano entre 20 e 30 empresas ourensás traballarán man a man con grupos de investigación, principalmente pero non só do campus de Ourense, no desenvolvemento de pequenas e grandes ideas. A finalidade última é dar un salto cualitativo na relación empresa-universidade e converter esta relación en estrutural e permanente e non só puntual.  

xoves 5 de abril de 2018

Na XXIII edición dunhas xornadas organizadas pola sectorial da CRUE que preside Salustiano Mato

57 representantes de 40 universidades españolas debaten en Vigo os retos de futuro das secretarías xerais

Abórdanse temas como a administración dixital, a loita contra o acoso ou a lei de contratos do sector público

Na XXIII edición dunha xornadas organizadas pola sectorial da CRUE que preside Salustiano Mato

As XXIII Jornadas de Secretarías Generales-CRUE Universidades Españolas reúnen estes días no campus de Vigo representantes de 40 institucións académicas superiores do Estado. En total 57 persoas, na súa maioría persoal das secretarías xerais, participan nunha xuntanza na que se debaten temas como a administración electrónica ou a aplicación da lexislación de contratación pública. No acto de apertura da xornadas, Salustiano Mato, reitor da Universidade de Vigo e presidente de CRUE–Secretarías Generales, remarcou a importancia dos temas que se van tratar nunha xuntanza que arrancou onte mércores coa celebración da Executiva da sectorial de Secretarías Generales–CRUE.

Reitoría | Campus Universitario | C.P. 36.310 Vigo (Pontevedra) | España | Tlf: +34 986 812 000 | informacion@uvigo.es            Accesibilidade | Mapa web | Aviso Legal