Cultura

luns 30 de outubro de 2017

O proxecto de arte gráfica coordinado polo grupo dx5 de BBAA deu lugar xa a 14 exposicións

Dúas mostras en México e Bélxica pecharán en 2019 unha iniciativa que reuniu 224 obras de once países

Un intre da inauguración da mostra en Madrid

Un total de 224 obras, realizadas por alumnado de 17 facultades e centros formativos de once países, reúnense en El Pliego / Le Pli / A Folder, o proxecto internacional de edición gráfica que coordinan as investigadoras do grupo dx5 (digital & graphic art research) da Facultade de Belas Artes Anne Heyvaert e Ana Soler. Un proxecto que deu pé nos últimos meses a un total de 14 exposicións, promovidas polas diferentes institucións participantes, e que nestes días fai posible que os traballos realizados polo alumnado se exhiban de xeito simultáneo en Madrid, Porto e na cidade serbia de Novi Sad.

luns 30 de outubro de 2017

Este luns presentouse a programación da 35 edición do certame

Estarán situadas na Sala Alterarte, na Biblioteca Rosalía de Castro, no estanque e no Edificio de Ferro

Este luns presentouse a programación da 35 edición do certame

85 exposicións, 280 autores e autoras, 66 espazos expositivos, 22 cidades de Galicia e Portugal e 85 entidades colaboradoras. Con estas cifras presentouse este luns no Liceo de Ourense unha nova edición, a 35, do festival Outono Fotográfico. Como xa vén sendo tradición, o campus de Ourense únese a esta iniciativa cultural tanto como entidade patrocinadora como acollendo varias das mostras que se desenvolverán no seu marco.

venres 27 de outubro de 2017

Luis Bueno expón na Sala X unha serie de obras xurdidas da súa tese de doutoramento

En ‘Ilusionismo persistente’, afonda en como a pintura ilusionista pode alterar os elementos dun cadro

Pezas situadas na parede central da exposición

Cadros que rachan co marco, co bastidor ou coa propia tea, cadros nos que a representación avanza polas propias paredes da Sala X ou adquire volume rompendo coa bidimensionalidade que define a pintura... O labor de investigación e produción que o doutor en BBAA José Luis Bueno desenvolveu para a súa tese tivo como eixo a posta en cuestión “de todos os elementos que constitúen o dispositivo cadro” desde a chamada pintura ilusionista, aquela que proxecta unha representación da realidade. Parte dos resultados dese traballo, agrúpanse na exposición Ilusionismo persistente.

venres 27 de outubro de 2017

Este venres coñeceuse o palmarés da 22 edición do certame

O galardón está dotado con 1500 euros pola Vicerreitoría do campus

Este venres coñeceuse o palmarés da 22 edición do certame

Este venres, unhas horas antes da celebración da gala de peche do Festival de Cine Internacional de Ourense Ouff, coñeceuse o palmarés do certame. Entre as obras galardoadas está Vermelho Russo, de Charly Braun, que se fixo co Premio do Xurado Universitario, dotado con 1500 euros pola Vicerreitoría do Campus de Ourense. A creación do Xurado Universitario está enmarcada no convenio de colaboración que o Concello de Ourense e a Universidade de Vigo asinaron recentemente.

xoves 26 de outubro de 2017

O docente Antonio Méndez analizou a separación entre o poético e a política na FFT

O acto foi organizado pola Cátedra Internacional José Saramago

O acto foi organizado pola Cátedra Internacional José Saramago

Antonio Méndez, profesor na Universidade de Valencia, atesoura unha grande experiencia no campo da comunicación e a influencia desta no eido social. Alén das investigacións académicas, representa unha das voces poéticas máis recoñecidas e influentes dentro da súa xeración, cunha obra na que explora, mediante a lírica, determinadas cuestións persoais para relacionalas, despois, coa actual situación política.   Este xoves, Antonio Méndez Rubio ofreceu unha conferencia no salón de graos da Facultade de Filoloxía e Tradución, organizada pola Cátedra Internacional José Saramago da Universidade de Vigo.

martes 24 de outubro de 2017

De outubro a decembro proxectaranse filmes de Kazan, Huston, Wilder, Lubitsch e os irmáns Coen

A actividade comeza este mércores 25 ás 20.00 h no edificio Cambón con ‘On the waterfront’, de Elia Kazan

Fotograma da película 'On the waterfront' Cinco clásicos do cine proxectados en versión orixinal. Estas son as características principais da nova edición do Ciclo de Cine e Lingua, que arrancará mañá mércores ás 20.00 h coa emisión de On the Waterfront (1954), película dirixida por Elia Kazan na que se conta a historia dun exboxeador que se atopa involuntariamente implicado nun crime cometido por un xefe portuario. O filme, que supuxo os inicios de Marlon Brando na gran pantalla, será o primeiro dos cinco que se poderán visionar, de outubro a decembro, en mércores alternos ás oito da tarde no edificio Cambón do Casco Antigo.

luns 23 de outubro de 2017

A xira arrancou onte en Vigo e prolongarase ata finais de ano

A dramatización corre a cargo dos actores Luis Correa O Caruncho e Chus Iglesias

Imaxe do primeiro pase realizado este domingo no mercado de Bouzas “A idea é levar a filosofía do que é Martin Codax ás rúas de toda Galicia”. Así explica o vicerreitor de Extensión Universitaria e Relacións Internacionais Manuel Fernández Iglesias o espírito co que esta fin de semana se puxo en marcha unha nova actividade para dar a coñecer á cidadanía de toda Galicia a presenza do Pergamiño Vindel en Galicia. Trátase da dramatización dun Cantar de Cego especialmente composto para a ocasión interpretado polo regueifeiro Luis Correa O Caruncho, no papel de cego, acompañado por Chus Iglesias como a súa guía.

venres 20 de outubro de 2017

A aula do campus participará no festival internacional de teatro universitario desa cidade marroquí

Será a primeira cita escénica importante deste curso académico

A aula do campus participará no festival internacional de teatro universitario desa cidade marroquí Este mércores, o campus de Ourense acolleu a presentación das catro aulas de teatro universitario, dos grupos que ao longo deste curso académico 2017/2018 se formarán nas artes escénicas e levarán a cabo diferentes representacións en todo tipo de escenarios. Conformados os grupos, un deles, o terceiro nivel, o máis avanzado, afrontará a vindeira semana a súa primeira cita importante. A Aula Maricastaña actuará no Festival Internacional de Teatro Universitario de Tánxer, que se celebrará do 23 ao 28 de outubro na cidade marroquí. Nel representará o venres 27 a última peza creada neste grupo, titulada A última cornixa do mundo.

xoves 19 de outubro de 2017

A Casa das Campás acolle este xoves unha nova edición de Conversas con Arte

Os sinais de identidade das e os artistas actuais e a hibridación con outras disciplinas son os eixos da xornada

A Casa das Campás acolle este xoves unha nova edición de Conversas con Arte Trazar unha panorámica sobre o sistema da arte actual en Galicia é desde hai cinco anos o motor de Conversas con Arte, o foro que a Área de Extensión do campus promove xunto coa produtora Latamuda. Tras centrar a súa anterior edición no legado do colectivo Atlántica, o coloquio que na tarde deste xoves se desenvolve na Casa das Campás arrincou debatendo os posibles nexos de unión entre as novas xeracións de artistas galegos. A denominación da Xeración Noroeste como o termo no que agrupar “a unha xeración de artistas, a maior parte saídos da Facultade de Belas Artes”, serviu como punto de partida á primeira das dúas mesas que integran o seu programa.

mércores 18 de outubro de 2017

Este mércores inaugurouse a exposición e presentouse o catálogo deste proxecto expositivo

As obras forman parte da colección desta sala do campus de Ourense

Este mércores inaugurouse a exposición e presentouse o catálogo deste proxecto expositivo Entre xaneiro de 2013 e agosto de 2015, a sala de arte contemporáneo do campus de Ourense, a Sala Alterarte, desenvolveu o proxecto expositivo Estado Crítico 2. 10 Comisarios 10 Artistas. Ao seu abeiro, foi acollendo once mostras doutros tantos creadores curadas por profesores da Universidade de Vigo. Ao londo deste tempo e como xa vén sendo tradición neste espazo, cada un dos artistas participantes doou unha obra súa á colección da sala universitaria. Este mércores inaugurouse no Centro Cultural Marcos Valcárcel da Deputación de Ourense a mostra Estado Crítico 2 na Colección Alterarte ao mesmo tempo que se presentou o seu catálogo.
Reitoría | Campus Universitario | C.P. 36.310 Vigo (Pontevedra) | España | Tlf: +34 986 812 000 | informacion@uvigo.es            Accesibilidade | Mapa web | Aviso Legal