Publicacións

martes 24 de abril de 2018

O profesor Guillermo Suárez analiza na súa última publicación esta cuestión

Detrás do capitalismo global actual, os piares económicos e xurídicos do Imperio Romano

A obra céntrase na libre circulación, no mercado de capitais e na personalidade xurídica corporativa

O profesor Guillermo Suárez analiza na súa última publicación esta cuestión

“Unha análise multidisciplinar dos alicerces económicos e xurídicos romanos universais que contribuíron á formación do noso capitalismo global”. Con este obxectivo preséntase a publicación Los Pilares Económicos y Jurídicos Romanos del Capitalismo Global, de Guillermo Suárez, profesor de Dereito Romano e Sistemas Xurídicos Contemporáneos da Facultade de Dereito do campus de Ourense. A obra, sinala o seu autor, afonda en como “na civilización romana xa existía un capitalismo global” froito da súa organización empresarial, económica e xurídica global. 

venres 20 de abril de 2018

Unha publicación do profesor Manuel Ojea presenta esta iniciativa

O Programa Relatea facilita a estudantes con autismo a creación de categorías conceptuais

O seu obxectivo é axudar a este colectivo a ter unha aprendizaxe significativa

Unha publicación do profesor Manuel Ojea presenta esta iniciativa

“Facilitar o desenvolvemento perceptivo-cognitivo das persoas con trastornos do espectro autista (TEA) a través da aprendizaxe de novos conceptos, a formación de categorías conceptuais que os engloban e o desenvolvemento de relacións interconceptuais”. Con este obxectivo vén de presentarse o libro Programa Relatea. Desarrollo de categorías conceptuales en estudiantes con trastornos del espectro autista, de Manuel Ojea, psicólogo e profesor da Facultade de Ciencias da Educación do campus de Ourense. Nel desenvólvese un programa aplicado xa experimentalmente con éxito neste colectivo.  

luns 9 de abril de 2018

Ciencias da Educación acolleu este luns a presentación dun libro sobre esta pedagoga represaliada

Falando da mestra Ernestina Otero como a ela lle gustaría que se fixese

A obra está dirixida a nenos e nenas a partir de seis anos de idade

Carlos Taboada, Xosé Manuel Cid, Manuel Puga e Enrique Mauricio durante a presentación

A Facultade de Ciencias da Educación acolleu este luns a presentación de Semente de igualdade, semente de liberdade. Pequena biografía de Ernestina Otero. A obra, dirixida a nenos e nenas a partir de seis anos, aborda dun xeito didáctico e visual “pero sen ocultar nada” a figura desta mestra e pedagoga represaliada, que impartiu docencia na antiga Escola Normal de Maxisterio, antecedente da hoxe Facultade de Ciencias da Educación do campus de Ourense. A presentación contou coa participación activa dun numeroso grupo de futuros educadores e educadoras que se están formando nas aulas deste centro.  

luns 2 de abril de 2018

A publicación é froito dun congreso internacional celebrado no campus

Un libro reivindica o papel de educadoras e educadores sociais na escola

Nas súas máis de 800 páxinas analízanse experiencias de éxito neste eido

Xosé Manuel Cid, Manuel Doval e Aurelio Prado durante a presentación este luns do libro

En setembro de 2016 a Facultade de Ciencias da Educación do campus de Ourense acolleu, e organizou con Nova Escola Galega e o Colexio de Educadoras e Educadores Sociais de Galicia, o I Congreso Internacional e III Xornadas de Educación Social e Escola. Unha análise da última década. Este luns presentouse o libro que recolle os traballos presentados nesa cita que reuniu a 150 profesionais e estudantes. Acorde co obxectivo dese congreso, a publicación xorde co obxectivo último de reivindicar a figura dos educadores e educadoras sociais no ensino.  

venres 23 de marzo de 2018

A profesora de Filoloxía e Tradución recolle as desditas de catro personaxes que se acaban atopando

Sexo, dor e crítica social mestúranse en 'Nadie Duerme', a última novela de Xina Vega

Tres meses despois da súa publicación, a obra conta cunha grande acollida do público

A autora do libro, no seu despacho da Facultade de Filoloxía e Tradución cun exemplar da novela

“Un mergullo na parte máis escura das nosas relacións, unha pescuda do corpo e da relación de poder coa que a miúdo construímos o fantasma do desexo”. Estes son algúns dos trazos que para Xina Vega, profesora do Departamento de Lingua Española, definen Nadie Duerme, a súa última novela. A terceira obra da docente, quen xa no 2007 acadara o Premio Xerais de Novela pola ópera prima Cardume, publicouse en decembro e, en tan só tres meses dende a súa chegada ás librarías, conta xa cunha grande acollida por parte do público e da crítica literaria.

martes 20 de marzo de 2018

Segundo o último informe de conxuntura elaborado polo Foro Económico

O crecemento da economía galega consolídase

O informe constata un incremento anual do PIB en termos reais do 3,1%

Segundo o último informe de conxuntura elaborado polo Foro Económico de Galicia

“Por segundo ano consecutivo, a economía galega presenta un crecemento anual do PIB en termos reais do 3,1%, encadeando nove trimestres consecutivos con incrementos iguais ou superiores ao 3%. A economía de Galicia presenta un crecemento equilibrado, ao presentar tanto a demanda interna como externa unha achega positiva ao crecemento agregado do PIB”. Esta é unha das conclusión recollidas no Informe de Conxuntura Socioeconómica l/2018. 

mércores 14 de marzo de 2018

José Victorio Moure presentou na Casa das Campás a súa nova novela '¿Omar o el Sargento Michel?'

Unha historia nacida no Líbano, asinada por un alumno sénior

O libro parte da súas propias experiencias en Oriente Medio

Fernández, Acuña e Moure, na presentación da novela

“Trátase dunha novela, pero esta baseada en feitos reais”. Deste xeito presenta o alumno do Programa Universitario para Maiores José Victorio Moure ¿Omar o el Sargento Michel?, o libro de ficción ambientado no Líbano no que relata a historia dun sarxento francés que se infiltra na organización chií libanesa Hezbolá. Un libro que, como recoñeceu na presentación promovida pola asociación de alumnado sénior do campus Asaexs, parte do seu interese e as súas vivencias nun país no que, como militar, participou nunha misión de Nacións Unidas en 2006 con motivo do conflito entre o exército israelí e Hezbolá.

luns 12 de marzo de 2018

A Casa das Campás acolleu a presentación dun monográfico sobre Europa da revista ‘Tempo Exterior’

A UE debe "construír cidadanía" a través dunha identidade compartida

A revista recolle as actas do II Congreso de Estudos Internacionais de Galicia, celebrado en setembro no campus

A Casa das Campás acolleu a presentación dun monográfico sobre Europa da revista ‘Tempo Exterior’

“Europa vive un momento particularmente vibrante pero non menos turbulento”. Deste xeito iníciase o apartado de conclusións do número monográfico da revista Tempo Exterior, que o Igadi dedica ao segundo Congreso de Estudos Internacionais de Galicia, que este instituto promoveu xunto coa Área de Ciencia Política e da Administración-Observatorio da Gobernanza G3. O volume, presentado este luns na Casa das Campás, recolle os relatorios presentados en setembro no congreso celebrado na Facultade de Ciencias Sociais e da Comunicación baixo o título de Repensar Europa desde aquí.

venres 2 de marzo de 2018

A Universidade de Vigo edita a 'As cantigas de Martín Codax en 55 idiomas'

Martin Codax convértese no autor galego traducido a máis linguas

Xosé-Henrique Costas coordina o volume, no que colaboraron máis de 70 persoas

Tradución das cantigas ao tamazight

Do emakhwa de Mozambique ao ruso, do alemán ao maorí de Nova Celandia, do croata ao guaraní do Paraguai, do zoque-popoluca mexicano ata o tamazigh do norte de África, pasando por case todas as linguas románicas e xermánicas, ata sumar un total de 55 idiomas. Martin Codax convértese no autor galego traducido a máis linguas coa publicación da obra As cantigas de Martín Codax en 55 idiomas, coordinada polo docente e investigador do Departamento de Filoloxía Galega e Latina da Universidade de Vigo Xosé-Henrique Costas.

xoves 1 de marzo de 2018

O Foro Económico publica o barómetro do sector referido a 2017 elaborado por Albino Prada

Máis volume exportador, menos empresas exportadoras

Nel saliéntase unha evolución moi favorable respecto ao conxunto de España

O Foro Económico publica o barómetro do sector referido a 2017 elaborado por Albino Prada

O Foro Económico de Galicia, coordinado polo Grupo Gen da Universidade de Vigo, vén de facer público este xoves o seu Barómetro Exportador de Galicia (Baexga) para o conxunto do ano 2017, elaborado por Albino Prada, profesor da Universidade de Vigo. Os datos recollidos destacan “a cara e cruz no desempeño exportador de Galicia” neste período xa que, sinalan, “aínda que aumenta o volume das exportacións, diminúe o número de empresas exportadoras”. 

Seguinte | Última

1 de 41

Reitoría | Campus Universitario | C.P. 36.310 Vigo (Pontevedra) | España | Tlf: +34 986 812 000 | informacion@uvigo.es            Accesibilidade | Mapa web | Aviso Legal