Publicacións

venres 29 de febreiro de 2008

Presentación do novo libro do profesor Xosé Rúas

"Quero ser presidente" ofrece aos candidatos as claves do triunfo electoral

Honradez, Humildade e sentido do Humor”. Son estas tres H as que, segundo o profesor Xosé Rúas, resumen as características básicas que debe ter calquera aspirante a líder. Sobre estas e outras claves para acadar o triunfo electoral versa o seu último libro Quero ser presidente, que vén de presentar na Facultade de Ciencias Sociais e da Comunicación, na que imparte docencia.
Trátase dunha publicación que reflicte a súa traxectoria docente e investigadora e na que afonda nos aspectos básicos para a realización dunha campaña electoral, aplicables a calquera persoa que se queira presentar a unha candidatura “dende un partido político ata unha asociación de veciños”.

mércores 20 de febreiro de 2008

Grazas ao traballo do grupo de Pintura e Escultura

Belas Artes xa dispón dunha guía para a súa carreira investigadora

Froito do traballo do grupo de investigación de Pintura e Escultura PE1-SEGUN, dirixido por Juan Fernando de la Iglesia, xurde o manual A carreira investigadora en Belas Artes, que pretende “servir de guía de uso interno”, tal como afirmou Ignacio Barcia, decano da Facultade de Belas Artes, durante a presentación do libro. “Esta publicación é síntoma de que a investigación está pasando por un período de crecemento e asentamento”, continuou Barcia.

venres 21 de decembro de 2007

Novo libro do profesor Candelas Colodrón

Un percorrido pola poesía de Quevedo da man das súas musas

Ofrece unha visión xeral dos versos do autor do Século de Ouro

“Quedaban poucos terreos que estudar e apreciei que o estudo de toda a poesía de Quevedo demandaba unha perspectiva de conxunto”. Así explicou o profesor do Departamento de Literatura Española e Teoría da Literatura, Manuel Ángel Candelas Colodrón, a motivación do seu último traballo, publicado baixo o título La poesía de Quevedo. Segundo subliñou o responsable do Servizo de Publicacións, Antón Palacio, “pecamos de modestia cando deberíamos presumir e alardear dos libros que se publican na Universidade”. Esta, engadiu, “é una boa mostra, unha das investigacións máis extensas e logradas e cunha salientable amplitude temática”.

luns 17 de decembro de 2007

Un libro do Servizo de Publicacións da Universidade

“Física en Imaxes” achega a ciencia á vida diaria dos cidadáns

Finalista do certame nacional Ciencia en Acción

Columbio de bebés Algunha vez preguntastesvos por que se producen as pompas de xabón ou por que os columpios para bebés teñen esa forma tan peculiar?. As respostas a estas cuestións e a moitas outras son as que se poden atopar no libro Física en Imaxes, unha obra que pretende aproximar o lector a esta disciplina a través de imaxes cotiás, desentrañando os conceptos e aspectos físicos fundamentais que estas esconden.

mércores 5 de decembro de 2007

Segundo volume da colección Tradución&Paratradución

"Tradución e Política Editorial de Literatura infantil e xuvenil", afonda no escenario do que se traduce

Obra de Ana Luna e Silvia Montero

Obra de Ana Luna Alonso e Silvia Montero Küpper, Tradución e Política Editorial de Literatura infantil e xuvenil, é un libro que segundo as súas autoras " quere abrir camiños para uns estudos sobre a tradución que teñan en conta os aspectos paratradutivos". Trátase, en definitiva, de " contribuir a unha aplicación anovadora da transversalidade nos estudos sobre tradución".
O segundo volume da colección Tradución&Paratradución, editado polo Servizo de Publicacións da Universidade de Vigo, afonda nas estratexias seguidas polas editoriais á hora de seleccionar non só a tradutores, autores, obras, etc, pero alén diso, "investiga na tremoia do escenario do que se traduce, coa fin de entender as circunstancias do mercado e mesmo propoñer metodoloxías que completan con novos elementos de análise a engranaxe da tradución".

xoves 22 de novembro de 2007

O autor portugués presentou a obra "África Acima"

Dende Boa Esperanza a Xibraltar coas crónicas de Gonçalo Cadilhe

O libro foi presentado no edificio Xurídico Empresarial

O salón de graos trasladouse por unha tarde ao continente africano con motivo da presentación do libro África Acima, un caderno de viaxe no que o portugués Gonçalo Cadilhe, recompila as crónicas semanais publicadas ao longo dos meses no xornal portugués Expresso, do seu percorrido entre o cabo de Boa Esperanza e o estreito de Xibraltar. Oito meses, quince países, 27.000 kilómetros e 50.000 palabras despois, o autor pode presumir de coñecer a maxia e os misterios dunha África sempre fascinante para o viaxeiro.

mércores 21 de novembro de 2007

Na presentación do libro "A fenda dixital e as súas implicacións educativas"

"O profesor non pode ser substituído polas tecnoloxías" declarou Domingo Docampo, ex Reitor da Universidade

O libro foi presentado polos seus coordinadores X.M. Cid e Xesús Rodríguez e o ex Reitor

Unha emblemática librería no casco vello da cidade, Torga, foi o escenario escollido para presentar A fenda dixital e as súas implicacións educativas. O libro, é unha recompilación das reflexións e análises que se levaron a cabo nun congreso co mesmo nome celbrado en Silleda e no que participaron diversos docentes e profesionais do mundo do ensino tanto de Galicia coma de Portugal.
Os coordinadores do mesmo, Xosé Manuel Cid, decano de Educación e Xesús Rodríguez, profesor e director da Revista Galega, foron os encargados de conducir o acto acompañados do antigo Reitor da Universidade de Vigo, Domingo Docampo.

xoves 15 de novembro de 2007

Pedro Membiela, na presentación dun libro sobre experiencias educativas:

“Hai que conseguir que a formación teña un núcleo importante de innovación”

“Unha obra excelente”, así cualificou Pedro Membiela, vicerreitor de Formación e Innovación Educativa, unha nova publicación que recolle as comunicacións presentadas na I Xornada de Innovación Educativa, que tivo lugar o 15 de decembro do pasado ano. Membiela presentou o libro ante o conxunto de autores que nel participaron, agradecéndolles “o esforzo do traballo colectivo para elaborar vinte e cinco capítulos de alta calidade e variada temática”, xa que “cousas como esta son as que demostran que a área de innovación da Universidade desenvolve unha actividade moi intensa”.

martes 30 de outubro de 2007

Fernando Ramos presenta un libro sobre protocolo e ceremonial universitario

É a primeira publicación editada que afonda neste campo

A inexistencia no mercado editorial dunha publicación que afonde no eido do protocolo dentro da institución universitaria foi a que levou ao profesor Fernando Ramos a embarcarse neste novo proxecto que tivo como resultado o libro “O Protocolo Universitario. Historia, tradicións e práctica actual do ceremonial na Universidade española”.
Foron catro meses de traballo para obter, segundo as verbas do profesor de Dereito da Información, “unha monografía baseada na recopilación e ordenación do material sobre protocolo, tradicións e acerbo universitario que vén dende a Idade Media ata os nosos días cunha profunda influencia relixiosa”.

luns 22 de outubro de 2007

Así se reflicte no libro A pobreza en Galicia, obra de tres profesores da UVigo

Un 10% de fogares galegos non dispón no seu enxoval doméstico do mínimo indispensable para non ser considerado como pobre

Mapa comparcal do IP A existencia en Galicia dun 10% de fogares pobres, é unha das conclusións ás que chegan os profesores da Universidade de Vigo, Patricio Sánchez, Antonio Vaamonde e Xenaro García no seu libro A pobreza en Galicia. Medición a través do equipamento dos fogares, publicado pola editorial Sotelo Blanco.
O libro que se inicia cunha revisión do concepto de pobreza, continúa co desenvolvemento e proposta dun novo método de medida a aplicar no caso concreto de Galicia. Trátase dun indicador, o índice de pobreza material, no que o foco de atención céntrase no equipamento co que as familias contan nas súas vivendas, e non en medidores monetarios, biolóxicos ou subxectivos. A construción dun novo indicador xustifícase segundo Patricio Sánchez por que “os que existían teñen problemas, e centrarse en cuestións materiais do fogar permite ser máis obxectivo, que se empregamos un indicador baseado en medidas monetarias como ingresos ou gastos”.
Reitoría | Campus Universitario | C.P. 36.310 Vigo (Pontevedra) | España | Tlf: +34 986 812 000 | informacion@uvigo.es            Accesibilidade | Mapa web | Aviso Legal