Investigación

xoves 28 de febreiro de 2008

Unha báscula conectada a internet permite aos médicos o control remoto do peso

Novas tecnoloxías que melloran a calidade de vida dos enfermos crónicos

Iniciativa de Wireless Galicia, a ETSE de Telecomunicación e o Juan Canalejo

Pacientes que sofren unha enfermidade crónica verán mellorada a súa calidade de vida coa utilización dun sistema que permitirá o control médico das súas patoloxías a través dunha báscula conectada ao teléfono móbil mediante o uso de tecnoloxía Bluetooth.
O sistema, froito do traballo conxunto do servizo de informática do Hospital Juan Canalejo de A Coruña, a empresa Wireless Galicia e o Grupo de Tecnoloxías da Información da Escola de Telecomunicación da Universidade de Vigo, permitirá aos facultativos do centro coruñés controlar os parámetros dos pacientes sen que estes teñan que desprazarse ao hospital. A fiabilidade tecnolóxica e o menor prezo son dous dos trazos máis salientable deste proxecto de telemedicina.

mércores 20 de febreiro de 2008

A empresa que inaugurará en breve instalacións en Santa Uxía de Ribeira, pertence ao grupo Bergé

Ecofloat Galicia desenvolve co traballo de titulados da Universidade de Vigo un sistema pioneiro para o control de calidade das augas

Universidade e Ecofloat asinaron un convenio e unha cátedra

Tras once anos traballando na sensorización, o grupo Bergé creou Ecofloat Galicia, unha empresa de I+D+i que en próximos meses inaugurará novas instalacións en Santa Uxía de Ribeira nas que se prevé traballen ata 30 persoas, na súa maior parte titulados da Universidade de Vigo procedentes das escolas de Enxeñaría Industrial e Telecomunicación.
A día de hoxe, nas súas dispersas instalacións de Pobra do Caramiñal, Ecofloat Galicia emprega xa once titulados superiores da Universidade de Vigo na que, como afirma Juan Antonio Cruz, director xeral da empresa “tras contactar con outras institucións académicas, atopamos as maiores garantías”. Froito deste vínculo e co fin de reforzalo, o reitor da Universidade de Vigo, Albergo Gago e o presidente do grupo Bergé, Jaime Gorbeña, asinaron dous convenios, un de colaboración e outro para a creación da Cátedra Ecofloat Galicia.

mércores 20 de febreiro de 2008

Segundo a tese de María Calado

Rapazas con baixa autoestima e desordes alimentarias, as máis vulnerables ante os medios

As persoas máis propensas a sufrir insatisfacción co seu corpo son as rapazas con coñecemento do ideal corporal social, desordes alimentarias, baixa autoestima e sobrepeso. Esta é unha das principais conclusións ás que chega a investigadora María Calado na súa tese de doutoramento, unha investigación na que analiza a influencia dos medios de comunicación na imaxe corporal e nas desordes alimentarias en estudantes de secundaria.
Na realización do estudo tivéronse en conta a relación entre a exposición dos rapaces ás revistas e á televisión coa interiorización e coñecemento do ideal sociocultural en canto ao corpo, a comparación, a autoestima, a insatisfacción corporal e as actitudes patolóxicas cara a comida.

 

luns 18 de febreiro de 2008

O prazo de presentación de traballos remata o 20 de abril

6000 euros para o gañador do Premio de Investigación y desarrollo de Medio Ambiente


O medio ambiente e a sostibilidade son os temas nos que deberán centrarse os traballos de investigación que concorran ao premio convocado pola Fundación ECA GLOBAL, a Federación de Asociacións de Antigos Alumnos e Amigos das Universidades Españolas e Universia para proxectos fin de carreira, teses doctorais e traballos de investigación realizados por titulados cunha antiguidade máximas de dous anos.

 

venres 15 de febreiro de 2008

600 traballos publicitarios compoñen a nova edición do anuario Creatividade Galega

Preséntase con salientables novidades no formato e na estrutura

Presentación do anuario "Un proxecto pioneiro en Galicia no que se escolman os traballos máis creativos de 70 empresas de publicidade, deseño e comunicación de Galicia”. Así define o anuario Creatividade Galega un dos seus autores, Chechu Pérez. Xunto con el, Alberto Dafonte e Eva Quintas, son os artífices desta iniciativa que vén de publicar a súa segunda edición. Estes tres docentes e investigadores da Facultade de Ciencias Sociais e da Comunicación presentaron, xunto con Ignacio Louzao, director xerente de Galicia Calidade, a nova publicación, que presenta importantes cambios con respecto á edición anterior. En total son 600 traballos clasificados por soportes, “o que comprende identidade corporativa, aplicacións gráficas, deseño editorial, deseño web, audiovisual, embalaxes e un pequeno caixón desastres para campañas multimedia e outros soportes como os de fidelización ou de márketing relacional”, salientan os autores.

venres 15 de febreiro de 2008

1º Premio FEGAS á Investigación Básica

A Consellería de Sanidade premia un traballo do Laboratorio de Endocrinoloxía

A investigación céntrase na carencia da hormona de crecemento en adultos

Un traballo sobre a eliminación da hormona de crecemento en suxeitos adultos fixo merecedor ao Laboratorio de Endocrinoloxía da Universidade do 1º premio FEGAS á Investigación Básica outorgado pola Consellería de Sanidade. O galardón, que recoñece o importante labor que se está a facer en investigación médica en Vigo, será entregado pola conselleira, Mª José Rubio, nun acto que se celebrará este luns 18 de febreiro na sede da consellería en Santiago de Compostela.

xoves 14 de febreiro de 2008

Grazas á concesión de unha bolsa José Castillejo para novos doutores

Un proxecto de investigación analizará e mellorará a imaxe de marca da Eurorrexión Galicia-Norte de Portugal

Coa colaboración da Universidade Fernando Pessoa de Porto

A Eurorrexión está de moda. Nos medios escoitamos ou lemos este termo a diario, pero… a cidadanía sabe o que é?, para que serve?, cales son os seus obxectivos?. Este é precisamente o punto de partida do proxecto de investigación que dúas profesoras da Facultade de Ciencias Sociais e da Comunicación acaban de comezar, grazas á concesión dunha bolsa que o Ministerio de Educación e Ciencia creou para novos doutores. Unha das implicadas no proxecto é a directora da Área de Extensión Universitaria e Estudantes, Ana Belén Fernández Souto, quen explicou que “non se sabe demasiado sobre o tema, hai un problema de comunicación latente”, e engadiu que “por iso a nosa idea é analizar a imaxe da Eurorrexión Galicia - Norte de Portugal e facer unha proposta para mellorala”.

mércores 13 de febreiro de 2008

Incorporación de Asia como destino dos bolseiros de posgrao da Fundación Barrié

Ata o 31 de marzo a convocatoria está aberta a titulados galegos cun proxecto académico ou investigador

luns 11 de febreiro de 2008

A maior parte da poboación nova do Val do río Ellas, en Cáceres, fala galego

Unha investigación do Observatorio de Sociolingüística constata este feito

Fronte ao aparente abandono que está a sufrir o idioma galego na nosa comunidade por parte dos máis novos, unha investigación levada a cabo dende a Facultade de Filoloxía e Tradución constata que a maior parte da poboación menor de 16 anos residente nos tres concellos estremeños do val do río Ellas, onde pervive unha variedade do galego, utiliza a fala, palabra coa que eles mesmos denominan a este dialecto. Esta conclusión é froito dun proxecto levado a cabo polo Observatorio de Sociolingüística, un equipo de traballo formado polos profesores Fernando Ramallo, Ana Iglesias e Anxo Lorenzo que, tras cinco anos de colaboración co grupo dirixido por Paulo Rodríguez Yáñez, decidiron unirse e buscar a súa propia dirección na investigación para afrontar retos diferentes, centrados principalmente no ámbito da política e da planificación lingüística.

venres 8 de febreiro de 2008

Segundo unha tese de doutoramento presentada na EU de Enxeñaría Técnica Forestal

A resistencia do millo á súa praga máis daniña pódese mellorar ao que tempo que se mantén un bo rendemento do gran

Germán V.Sandoya aplicou un programa de selección de metodoloxía clásica

As plantacións de millo son moi importantes para a agricultura do país, sen embargo cada vez resulta máis complicado obter un produto de calidade debido aos grandes danos que causa unha das pragas máis prexudiciais desta planta, o barreno do millo. A praga está ocasionada polo ataque das especies lepidópteras Sesamia nonagrioides e Ostrinia nubilalis, pero a variedade que predomina no noroeste da Península Ibérica é a primeira sendo a verdadeira culpable das importantes perdas económicas que poñen en situación de crise a moitos agricultores.

Primeira | Anterior | Seguinte | Última

239 de 248

Reitoría | Campus Universitario | C.P. 36.310 Vigo (Pontevedra) | España | Tlf: +34 986 812 000 | informacion@uvigo.es            Accesibilidade | Mapa web | Aviso Legal