Institucional

martes 25 de setembro de 2007

Na EU de Enxeñaría Técnica Forestal

A EUET Forestal acolleu o acto de presentación do curso académico 2007-2008 aos alumnos matriculados en primeiro. O obxectivo era dar a benvida aos novos estudantes e presentarlles a Universidade e a titulación que acaban de escoller. Ao longo da sesión, ademais das explicacións do director da Escola e dos subdirectores, Carlos Basalo e Henrique Lorenzo, os alumnos recibiron numerosa documentación onde se detallaban aspectos como plano de estudos, programas formativos e de intercambio ou as saídas profesionais.

martes 25 de setembro de 2007

Os universitarios gozan do 50% de desconto

Dos autobuses urbanos do Concello de Ourense

A partir de agora aos estudantes do Campus de Ourense resultaralles un pouco máis difícil xustificar as súas tardías á hora de acudir ás clases. A razón, o número 20, nome que recibe a nova lanzadeira disposta polos autobuses urbanos do Concello de Ourense para acudir ao recinto universitario.
Durante todo o curso, todos os alumnos poderán acceder a este percorrido de ida e volta dende o centro da cidade, concretamente, dende o Parque de San Lázaro.

martes 25 de setembro de 2007

Declaracións do Secretario de Estado de Universidades no DUVI

O Secretario de Estado de Universidades e Investigación tivo ocasión de coñecer, hai uns días, o campus de Lagoas-Marcosende da Universidade de Vigo. Invitado polo Reitor, Alberto Gago, Miguel Angel Quintanilla, falou, ante unha ampla representación da comunidade universitaria, sobre o proceso de reforma do sistema universitario e da política científica do goberno.
Ano e medio despois da súa toma posesión, o Secretario de Estado de Universidades, analiza nunha entrevista concedida ao DUVI, cuestións básicas para o futuro da universidade como a reforma da LOU, a adaptación ao Espazo Europeo de Educación Superior ou a evolución da ciencia e a investigación.
Quintanilla explica, tamén, nas seguintes liñas, a polémica xurdida o pasado verán despois que afirmase que “ser un gorrón ten sido moi rendible na universidade”, e da “grata sorpresa” que lle causou a súa visita ao campus vigués.

martes 25 de setembro de 2007

Así é o novo Diario Dixital da UVigo

Coa finalidade de mellorar o servizo que presta tanto á comunidade universitaria, como aos medios de comunicación, preséntase a partir de hoxe unha renovada versión do Diario da Universidade de Vigo.
Desde o nacemento do DUVI, no ano 2000, ata a actualidade producíronse cambios que esixen unha reformulación non só visual, senón tamén na distribución e variedade de contidos, así como a súa funcionalidade de aí que unha das súas principais novidades sexa a publicación inmediata da información. Da portada estática de edicións precedentes, o novo DUVI opta por un estilo dinámico, máis propio do xornalismo electrónico fronte aos xornais tradicionais.
Por outra banda e coa finalidade de reflectir a súa puxante autonomía, a publicación estrutúrase a partir dos distintos campus, Ourense, Vigo e Pontevedra que pasan a ter seccións independentes que permiten coñecer todas as noticias referidas a cada un dos campus.

martes 25 de setembro de 2007

Benvida aos alumnos

Estudantes no acto A crise das TIC comeza a remontarse e o futuro laboral para os estudantes da ETS de Enxeñeiros de Telecomunicación pinta máis que positivo. Esta foi a mensaxe principal que o director da escola, José María Pousada, quixo transmitir no acto de acollida aos alumnos de primeiro e lección inaugural. Os estudantes tiveron a oportunidade de escoitar neste acto un par de consellos da man do profesor Sigfredo Pagel, que este ano se xubila tras máis de corenta anos impartindo docencia.

Primeira | Anterior

240 de 240

Reitoría | Campus Universitario | C.P. 36.310 Vigo (Pontevedra) | España | Tlf: +34 986 812 000 | informacion@uvigo.es            Accesibilidade | Mapa web | Aviso Legal