Institucional

xoves 28 de febreiro de 2008

O campus recibe a 25 novos alumnos de intercambio no segundo cuadrimestre

Máis da metade estudarán en Ciencias Sociais e da Comunicación

Unha experiencia enriquecedora para todos, para os estudantes estranxeiros, para os alumnos da Universidade de Vigo e para a propia institución. Con este obxectivo comezan a súa estancia no campus de Pontevedra os 25 novos estudantes de intercambio do segundo cuadrimestre. Para informalos da oferta de actividades complementarias e facilitarlles a adaptación e interacción cos seus compañeiros, este xoves a vicerreitoría do campus ofreceulles un acto de benvida. Xunto co vicerreitor pontevedrés, Jesús Hernández, recibiron aos novos estudantes do campus o vicerreitor de Relacións Institucionais, Iván Area; a técnica da ORI, Eva Garea; a directora a área de Extensión Universitaria e Estudantes do campus de Pontevedra, Ana Belén Fernández Souto e o director do Centro de Linguas, Jorge Figueroa.

mércores 27 de febreiro de 2008

Procedentes de máis de 30 países

A Universidade dá a benvida a 205 novos estudantes estranxeiros

Javier Rial, Henrique Monteaguado, Anselmo Seoane, Eva Garea e Jorge Figueroa 200 estudantes, máis de 30 países, multitude de linguas. A Universidade internacionalízase ano tras ano coa chegada de estudantes estranxeiros, aos que este mércores se lles ofreceu un acto de benvida na Facultade de Filoloxía e Tradución, o centro no que cursarán estudos a maioría deles. Ademais da vida académica, a Universidade ofrécelle a estes estudantes unha ampla oferta de iniciativas que puideron coñecer de primeira man neste acto.
En total, son 205 novos estudantes nos tres campus, dos que 153 estarán en Vigo neste segundo cuadrimestre e, a estes, hai que engadir os 120 alumnos que teñen unha bolsa para todo. Segundo subliñou Eva Garea, técnica da Oficina de Relacións Internacionais, “entre Erasmus, ISEP e outras bolsas e convenios, este ano sodes máis de 500 estudantes de intercambio na Universidade e agardamos que cada ano sexades máis”.

martes 26 de febreiro de 2008

Luz verde do Consello Galego de Universidades

A Universidade ampliará en case unha vintena a súa oferta de títulos de máster de doutor para o vindeiro curso

Na actualidade hai 14 en marcha

Un total de 17 títulos de máster e doutor nos ámbitos tecnolóxico, científico, xurídico-social e humanístico, pasarán a engrosar o vindeiro curso a oferta da Universidade de Vigo que supera así a trintena de títulos enmarcados nos Programas Oficiais de Posgrao.
Tralo visto bo do Consello Galego de Universidades que aprobaba nas últimas horas un total de 34 títulos novos no Sistema Universitario Galego, a implantación dos estudos oficiais de grao será autorizado mediante decreto do Consello da Xunta de Galicia. Deste xeito o vindeiro curso 2008/2009 as universidades de A Coruña, Santiago de Compostela e Vigo, impartirán un total de 34 novos títulos que se suman aos 71 que xa están en vigor na actualidade.

martes 26 de febreiro de 2008

Joaquín Sueiro, decano da Facultade de Filoloxía e Tradución:

“Non me parece de recibo a posibilidade de que co EEES non existan en Galicia estudos específicos de Filoloxía Galega”

O docente apunta que a saída profesional dos filólogos non ten que ir abocada á docencia

Joaquín Sueiro (Vigo, 1958) é, dende o 2005, decano da Facultade de Filoloxía e Tradución, o centro máis internacional da Universidade de Vigo, onde conviven estudantes con linguas e culturas procedentes de todo o mundo. Ao tempo, falamos dunha facultade que acolle unha das titulacións máis demandadas do sistema universitario galego, a licenciatura en Tradución e Interpretación.
Tras case tres anos no decanato e, sen intención inicial de volver a presentarse a unha reelección, Sueiro fai balance da súa experiencia ao fronte da facultade.

luns 25 de febreiro de 2008

O dossier da candidatura de Vigo á Universiada, no Consello Superior de Deportes

O 4 de marzo terá lugar a defensa o proxecto ante unha comisión do CEDU

A conta atrás para coñecer a cidade que acollerá a Universiada 2013 continúa. A candidatura de Vigo presentou este luns no Consello Superior de Deportes o seu dossier, paso previo á defensa do proxecto o vindeiro 4 de marzo en Madrid. Trátase dun documento que contempla as esixencias e requirimentos determinados polo Federación Internacional de Deporte Universitario para optar a ser a sede. O dossier da candidatura comprende 18 capítulos nos que se fai referencia ás infraestruturas deportivas, ás comunicacións, á oferta hoteleira, ao organigrama, aos aspectos legais e financeiros e tamén á programación cultural prevista paralela á cita deportiva.

venres 22 de febreiro de 2008

O reitor, Alberto Gago, nomeado presidente do centro

O Centro Internacional de Eficiencia e Sostibilidade Enerxética, Energylab, iniciará a súa actividade no campus de Vigo

No futuro instalarase en CITEXVI

Fernando Blanco, Honorato López Isla e Alberto Gago O Centro Internacional de Eficiencia e Sostibilidade Enerxética, Energylab, promovido por FENOSA, xunto con outras empresas, as tres universidades galegas e a Consellería de Innovación e Industria, iniciará a súa actividade no campus vigués, concretamente nunhas dependencias especialmente habilitadas no edificio Newton.
Energylab, presentado este venres en sociedade polos máximos responsables de FENOSA, a Universidade de Vigo e a Consellería de Industria, nace co obxectivo de impulsar o uso de tecnoloxías eficientes, cun menor impacto ambiental, a prezos competitivos e cun nivel de calidade equivalente e mesmo superior para o consumidor.

xoves 21 de febreiro de 2008

Pedro Membiela, vicerreitor de Formación e Innovación Educativa

“Estase a producir unha diversificación que obriga ás universidades a pensar noutros tramos de idade e noutros obxectivos”

Das aulas de Secundaria, onde iniciou a súa actividade docente, deu o salto, na década de 1990, ás da Universidade, primeiro en Maxisterio e posteriormente na Facultade de Ciencias da Educación, onde actualmente exerce como profesor titular de Didácticas das Ciencias Experimentais. Sumados son máis de trinta os anos de actividade docente que acumula este licenciado en Bioloxía e doutor pola Universidade de Santiago, orixinario do municipio lucense de Riotorto onde naceu o 6 de xaneiro de 1953.
Editor da Revista Electrónica de Enseñanza de las Ciencias e da editorial Educación Editora, o ámbito educativo centra as súas investigacións, entre as que tamén figuran traballos dedicados á bioloxía animal e ecoloxía dos ríos. Autor de varios libros e numerosos artigos, Pedro Membiela compaxina a súa actividade docente, desde hai case dous anos coas responsabilidades de vicerreitor de Formación e Innovación Educativa, unha área encargada de actividades como o Programa de Formación Permanente de Profesorado da Universidade de Vigo, os Títulos Propios de Posgrao, o Curso de Aptitude Pedagóxica (CAP) e o Programa para Maiores.

luns 18 de febreiro de 2008

A Academia Olímpica Española celebra no campus o seu 40 aniversario

A Facultade de Ciencias da Educación e do Deporte afiánzase como referencia nacional no ámbito da formación deportiva

Fernández Lores, Rafael Louzán e Alberto Gago acudiron á inauguración

Participantes na inauguración Institucións académicas, deportivas e políticas uníronse este luns na Facultade de Ciencias da Educación e do Deporte para apoiar a celebración do 40º aniversario da Academia Olímpica Española. O acto puxo de manifesto non só a forte aposta da Universidade de Vigo polo deporte, senón tamén o feito de que a facultade pontevedresa se está a converter nun referente a nivel nacional no ámbito da formación deportiva.

luns 18 de febreiro de 2008

Direccións de centros, claustros, consellos escolares e ANPAs, serán os destinatarios

A Universidade de Vigo e os concellos de Ourense, Pontevedra e Vigo impulsan unha campaña informativa sobre o uso das linguas no sistema educativo

Comezará a mediados do mes de marzo


Ampliar o coñecemento e explicar os obxectivos do Decreto 124/2007 entre as comunidades educativas, é a razón pola que a Universidade de Vigo e os concellos de Ourense, Pontevedra e Vigo impulsarán unha campaña centrada nos contidos e efectos positivos que a norma pretende introducir no sistema escolar galego.
A iniciativa da vicerreitoría de Relacións Institucionais e a Área de Normalización Lingüística da Universidade de Vigo e as concellarías de Educación e Normalización Lingüística dos concellos de Ourense, Pontevedra e Vigo, materializarase na sinatura dun convenio de colaboración que se plasmará inicialmente na elaboración de material científico informativo que será distribuído entre a cidadanía en xeral e a comunidade escolar en particular, así como na organización de charlas explicativas en consellos escolares, profesorado e ANPAs.

venres 15 de febreiro de 2008

Nos terreos contruirase unha pista de atletismo e un campo de fútbol e rubgy

O Concello de Ourense cede ao campus máis de 13.000 metros cadrados de terreo para instalacións deportivas

O campus conta dende hoxe con 13.550 metros cadrados máis de terreo cedidos polo Concello de Ourense para a construción das novas instalacións deportivas. Alberto Gago, reitor da Universidade de Vigo e Francisco Rodríguez, alcalde da cidade, foron os encargados de asinar o convenio de colaboración polo que o campus contará a finais de ano con pista de atletismo e campo de fútbol e rugby. A parcela, situada detrás do Pavillón de Deportes, súmase a outra de máis de 10.000 metros propiedade da Universidade, para a mellora das infraestruturas deportivas.

Primeira | Anterior | Seguinte | Última

240 de 253

Reitoría | Campus Universitario | C.P. 36.310 Vigo (Pontevedra) | España | Tlf: +34 986 812 000 | informacion@uvigo.es            Accesibilidade | Mapa web | Aviso Legal