Cultura

martes 20 de novembro de 2007

Esteban Beltrán, director da sección española de Amnistía Internacional:

"A guerra contra o terrorismo debe ser substituída pola guerra contra a pobreza"

“A impudicia da tortura avanza”, e avanza coa escusa e o respaldo que lle ofrece a loita global contra o terrorismo. Estas son as premisas que, segundo Esteban Beltrán, director da sección española de Amnistía Internacional, “nos levan a poder afirmar que estamos vivindo tempo difíciles, nos que deberiamos estar loitando contra a pobreza e non contra o terror”.
Beltrán afondou deste xeito nas difíciles relacións entre a loita contra o terrorismo a seguridade e os dereitos humanos nun relatorio organizado pola Área de Igualdade. Estes tempos de guerra sen leis derivan en “cinco medos fundamentais que paralizan á xente”: medo á chegada masiva de inmigrantes, o medo real aos atentados terroristas, o medo á liberdade de expresión e ao que disinte, medo ao aumento da criminalidade e, finalmente, medo ao outro, ao diferente.

martes 20 de novembro de 2007

Ante as informacións aparecidas nalgúns medios os organizadores de San Teleco fan público un manifesto

A organización de San Teleco 2007 fixo público un comunicado no que expresa o seu desacordo coas informacións publicadas nalgúns medios con respecto a esta celebración.
No manifesto, que consta de catro puntos, a organización do San Teleco O7 afirma que “durante toda a xornada non se produciu ningún coma etílico no campus e só se levaron a cabo dous traslados en ambulancia.”

martes 20 de novembro de 2007

A Oficina de Voluntariado organiza dous obradoiros no mesmo cuadrimestre debido á demanda

Remata o obradoiro de formación básica de Voluntariado e comeza o de Planificación de actividades de lecer

Tras unha intensa semana de aprendizaxe, remata o obradoiro máis solidario do campus: o de voluntariado. Este primeiro curso, de formación básica dentro dos enmarcados no ámbito do voluntariado, ten como obxectivo dotar aos alumnos das ferramentas xerais para exercer o seu traballo. Despois, será a entidade coa que colaboren a encargada de darlles unha instrucción máis especializada segundo o seu campo de actuación.
Ademais, comeza o segundo obradoiro do cuadrimestre organizado pola Oficina de Voluntariado e Integración, o de Planificación de actividades de lecer, unha formación moi útil nas ONG para organizar e dinamizar con éxito actividades no ámbito social.

luns 19 de novembro de 2007

O teatro, protagonista da vida cultural

Yllana pon a música e La Máscara o mimo

"Un divertido desconcerto que repasa algúns dos momentos cumio da música clásica, xunto con fragmentos musicais cargados de referencias cinematográficas". Así é Pagagnini, a última montaxe do grupo Yllana que este mércores se presentará no Teatro Cidade Universitaria, dentro da programación organizada pola vicerreitoría de Extensión Cultural.
Ao día seguinte, xoves 22, o protagonismo será para o teatro de rúa coa compañía arxentina La Máscara que representará no Centro Comercial o seu espectáculo Marcelopuntomine. O grupo está liderado por Marcelo González, considerado un dos mellores mimos do seu país.

venres 16 de novembro de 2007

Na sede da Fundación Laxeiro

A Fundación Laxeiro acolle a exposición “Facer e Deixar Facer” coas obras de alumnos e docentes de Belas Artes

Recollendo as obras de alumnos e profesores da facultade de Belas Artes

Ata o vindeiro 13 de xaneiro poderase visitar a exposición Facer e Deixar Facer que organiza a facultade de Belas Artes en colaboración coa Fundación Laxeiro. Dez artistas da propia Universidade de Vigo amosarán obras feitas exclusivamente para esta mostra acerca dun tema peculiar: Facer e Deixar Facer, centradas na reflexión de que sempre que se fai algo, déixase de facer outra cousa.Carlos Aldao, Miguel Cuba, Sara Fuentes, Juan Loeck, ou Ana Seoane, son algúns dos artistas que amosarán as súas obras na exposición.

xoves 15 de novembro de 2007

O grupo de artistas independentes exporá a súa obra no Pavillón da Asociación de Estudantes

A fotografía chega ás noites do campus coa videoproxección de "Los Purificados"

A iniciativa enmárcase dentro do "Outono fotográfico"

Ao caer a noite, invade o campus unha novidosa exposición fotográfica. Por unha vez os receptores da arte son os muros exteriores e non as paredes dunha sala. Tampouco estamos a falar de fotografías en formato físico senón que as imaxes veranse proxectadas nos cristais do Pavillón das Asociacións de Estudantes.
Enmarcada dentro do “Outono fotográfico” chega a Ourense a videoproxección de “Los Purificados”, un grupo de fotógrafos e artistas independentes que tentan buscar novas vías de expresar coas súas obras.
O colectivo, creado a principios de ano, xurde ante a dificultade de expoñer en circuítos tradicionais e a necesidade de atopar alternativas en distintos soportes para a fotografía artística. Está composto por uns 60 fotógrafos de todo o territorio nacional ademais do estranxeiro, aínda que na proxección participan só a metade.

xoves 15 de novembro de 2007

Lagartija Nick presentou o seu último traballo

O Teatro Vidal Bolaño vibrou cos acordes de El shock de Leia

Ectoplasma precederon aos granadinos no escenario

Decenas de persoas tiveron ocasión de disfrutar nas últimas horas no Teatro Vidal Bolaño da música de Lagartika Nick, no concerto no que a banda granadina presentou o seu último traballo El shock de Leia. Nunha nova sesión do ciclo Sonora 07, a banda de Antonio Arias estivo precedida sobre o escenario polo grupo Ectoplasma que lidera Nico Pastoriza.
A proxección, por primeira vez en Galicia, do documental de Lian Lunson, Leonard Cohen I’m your man, porá este xoves un broche de ouro á edición de inverno do Sonora.

xoves 15 de novembro de 2007

Poderá visitarse ata o 6 de xaneiro

Os amish e "A Noite do cazador", inspiración dos deseñadores na mostra Esdemga 2.1

Inaugurada na Casa Galega da Cultura en Vigo

Obra da exposición Durante máis dun mes poderá visitarse na Casa Galega da Cultura a exposición Esdemga 2.1 que mostra os proxectos dos alumnos da segunda promoción de Estudos Superiores de Deseño Textil e Moda, titulación propia da Universidade de Vigo. Os amish e a película A Noite do Cazador de Robert Mitchum, foron as referencias dos novos deseñadores nesta mostra inaugurada nas últimas horas.Coordinados por Alfredo Olmedo e Charo Froján, docentes encargados da Área de Deseño do segundo curso, a exposición é froito do traballo en equipo de alumnos e profesores.

mércores 14 de novembro de 2007

O ciclo Sonora estrea en Galicia o documental “Leonard Cohen I’m your man”

Antes da proxección Sonora organiza un concerto con grupos locais

A homenaxe ao músico canadense Leonard Cohen pecha este xoves o ciclo Sonora 07. A proxección, por primeira vez en Galicia, do documental de Lian Lunson “Leonard Cohen I’m your man” porá un broche de ouro á edición de inverno do Sonora, un festival que “volve á Universidade de Vigo a música no seu estado máis puro: o directo, para gozar do pracer por escoitar –e tamén ver- as músicas que fagan falar as nosas emocións”, en palabras de Mª del Carmen Cabeza, vicerreitora de Extensión Cultural e Estudantes.

mércores 14 de novembro de 2007

Joaquín Estefanía, na clausura de Universium:

“Para repartir o poder habería que repartir a riqueza”

A desaparición dos políticos entre os grupos das persoas máis poderosas do mundo, é unha mostra representativa do que está a mudar o concepto de poder nas sociedades actuais. O seu lugar está sendo substituído polo poder económico e, dentro del, principalmente poder financeiro. Para afondar na contraposición entre estes dous poderes, o xornalista e analista Joaquín Estefanía ofreceu un relatorio co que se clausurou o ciclo de conferencias Universium. “Nas elites poderosas, os primeiros postos están ocupados por empresarios, comunicadores e financeiros”, explicou. Segundo Estefanía, esta supremacía do económico sobre o político é a base arredor da que se organiza a globalización: “a globalización é económica, non política e, dentro da economía, o poder reside no ámbito financeiro”. Deste xeito, a política en moitos casos xa non é o primeiro poder, incluso pode chegar a ser o terceiro, por detrás do poder económico e do mediático.
Joaquín Estefanía é director da Escola de Xornalismo da Universidade Autónoma de Madrid / El País, xornal que dirixiu entre 1988 e 1993 e do que agora é columnista.

Primeira | Anterior | Seguinte | Última

207 de 212

Reitoría | Campus Universitario | C.P. 36.310 Vigo (Pontevedra) | España | Tlf: +34 986 812 000 | informacion@uvigo.es            Accesibilidade | Mapa web | Aviso Legal