luns 16 de abril de 2018
Pontevedra acolle unha serie de actividades articuladas en torno ao Campus Crea S2i
Igualdade e sustentabilidade para dar inicio á Semana Internacional da Creatividade e da Innovación
A Casa das Campás acolle desde este luns a exposición ‘Achegas das mulleres á sustentabilidade do mar’
Eduardo Muñiz | Pontevedra
O campus de Pontevedra inicia este luns un amplo programa de actividades articulado en torno aos dous piares do seu proxecto de especialización, Crea S2I, a creatividade e a innovación social e sustentable, fío de unión das preto de vinte propostas que integran o programa impulsado pola Vicerreitoría do campus coa colaboración das diferentes facultades e escolas. A Semana Internacional da Creatividade e da Innovación deu comezo na mañá deste luns coa apertura da exposición Achegas das mulleres á sustentabilidade do mar, primeiro acto dun programa que aglutina conferencias, actividades culturais, obradoiros e sesións de traballo dirixidas ao persoal docente e investigador.
Comisariada pola profesora da Facultade de Ciencias da Educación e do Deporte María Álvarez Lires e desenvolvida coa colaboración de Deputación de Pontevedra, Campus de Excelencia Internacional-Campus do Mar e Unidade de Igualdade da Universidade de Vigo, a exposición que ata o 21 de maio poderá visitarse na sede da Vicerreitoría chega a este espazo tras pasar polos tres campus da institución académica. “A idea de traela de volta aquí é a de achegala á cidade”, sinala Álvarez Lires dunha mostra que reúne nos seus diferentes paneis unha escolma de 40 fotografías, que abranguen desde as primeiras décadas do pasado século á actualidade, co propósito de pór en valor o traballo, “moitas veces invisible”, desenvolvido polas mulleres en diferentes sectores e actividades vinculadas ao mar. Traballadoras da salga e da conserva, mariscadoras ou vendedoras de peixe protagonizan así unha exposición que presenta un bo número de fotografías inéditas e que se completa con dous paneis dedicados ás oceanógrafas Aida Fernández Ríos e Ángeles Alvariño e que o grupo de investigación da Área de Didáctica das Ciencias Experimentais desenvolveu xunto cunha web con diferentes recursos, “que continuamos ampliando con novos materiais”.
Na apertura da exposición, a comisaria estivo acompañada polo director da Área de Extensión Cultural do campus, Manuel Morquecho, quen destacou que esta iniciativa “encaixa perfectamente dentro da Semana da Creatividade e da Innovación e dun campus sostible”, ademais de supor tamén unha aposta pola igualdade, “poñendo en valor algo que é evidente pero que moitas veces non se ve”.
Así mesmo, na primeira xornada desta Semana Internacional da Creatividade e da Innovación insírese tamén a gravación na Casa das Campás do programa RadioEscaparate, que realizan estudantes de CCSS e da Comunicación, que nesta ocasión centrará nos contidos nesta semana, e a proxección, no Teatro Principal, do documental Las chicas de Amanecer Dorado, dentro do ciclo Docs del Mes.
Diferentes actividades abertas ao público
Morquecho tamén puxo de relevo que esta exposición é a primeira dunha “serie de actividades abertas ao público” no marco desta semana, como o concerto no que este martes ás 20. 30 horas cuarteto de corda de instrumentos orixinais que integran os músicos e docentes do conservatorio Manuel Quiroga Xacobe Lamas, Sergio Heredia, Salvador Vicente e Arquímedes Abal interpretará na Casa das Campás composición de Haydn, Boccherini ou Richter. Tamén conferencias como O futuro do traballo na cuarta revolución industrial, que o mércores impartirá o coordinador da Rede Galega de Fablabs, Ramón Suárez; Ensinar ciencias a través do teatro, que o xoves traerá a Ciencias da Educación e do Deporte ás docentes da Universitat Autónoma de Barcelona Moira Costa e Nuria Solsona; eo relatorio sobre a arte no Xapón que ese mesmo día ofrecerá en Belas Artes Javier Vives. Do mesmo xeito, a partires deste martes poderá visitarse en CCSS e da Comunicación a exposición Talento Creativo e Innovador. 30 propostas de innovación de produtos, que reúne en diferentes paneis as ideas de produtos innovadores que desenvolveron preto de 150 estudantes da facultade.
Obradoiros, seminarios e un concurso
No programa desta semana insírense tamén diferentes obradoiros dirixidos á comunidade universitaria, como o taller de experimentación audiovisual que desde este martes imparte na Casa das Campás, en colaboración co festival Novos Cinemas, a artista e videocreadora María Cañas. Tamén mañá, Ciencias da Educación e do Deporte acolle un obradoiro de relaxación e control da ansiedade, que se desenvolve xunto co Gabinete Psicopedagóxico, mentres que CCSS e da Comunicación acolle mércores e xoves dous talleres prácticos sobre organización de eventos e desenvolvemento de actividades de comunicación e linguaxe, promovidos en colaboración co XVIII Curso de Comunicación e Protocolo-Xornadas Internacionais de Comunicación Institucional e Imaxe Pública. Nesta facultade desenvolverase ademais, o xoves, o taller Como converter unha idea en realidade con ferramentas de fabricación dixital.
Dúas sesións de traballo, sobre transferencia e agrupacións estratéxicas, dirixidas aos investigadores e investigadoras do campus forman parte tamén dun programa que se completa cun concurso de fotografía en Instragam, aberto a todas as persoas maiores de 13 anos, que ten como temática o Campus Crea S2i e os seus valores de innovación, creatividade e compromiso ambiental.