venres 13 de abril de 2018

O reitor destacou que estes galardóns “romperon as barreiras de ámbito e xénero”

11 ideas que soñan con converterse en negocio gañan a 7ª edición dos Premios Incuvi

Mediación Móvil e Ouvir Servizos socioeducativos, gañadores da convocatoria Avanza

M. Del Río / D. Besadío | Vigo

Deporte, promoción lingüística, cultura, innovación docente, enerxías renovables, aproveitamento forestal, deseño téxtil e aplicacións móbiles. Nestes eidos céntranse as once propostas de emprendemento gañadoras da sétima edición dos Premios Incuvi Emprende, impulsados pola Universidade de Vigo e a Fundación Universidade de Vigo e dirixidos ao estudantado que desenvolve unha idea de negocio creativa baseada en calquera das ramas do coñecemento. Este venres, o reitor da Universidade, Salustiano Mato, entregou os diplomas e as chaves das súas futuras oficinas ás e aos impulsores destes proxectos.

En total son 11 premios, que se instalarán nos espazos de preincubación dispoñibles nos tres campus: seis en Vigo, tres en Ourense e dous en Pontevedra. Mato felicitounos polo seu “empeño e creatividade, porque a través deste programa estades tentando fabricar un bo futuro para vós e levar o nome da Universidade polo mundo adiante a través das vosas ideas e dos vosos proxectos”. O reitor destacou tamén a aposta da Universidade polo emprendemento, “unha materia pendente cando puxemos en marcha Incuvi en 2011”. Neste tempo, remarcou, o programa “non só creo cultura emprendedora, senón que conseguimos entre todos e todas romper as barreiras dos ámbitos do coñecemento, con proxectos gañadores de calquera eido, dende enxeñaría á economía, o deporte, as artes ou as ciencias, e tamén rompemos a barreira de xénero, e xa hai tantas emprendedoras como emprendedores”. En total apuntou Mato, son máis de 200 as ideas que se presentaron ao certame dende o seu inicio, moitas delas xa consolidadas como empresa.

O reitor estivo acompañado de Roberto Castro, subdelegado do Goberno en Ourense, e José Alfonso Marnotes, director xeral de Orientación e Promoción Laboral da Xunta de Galicia, que salientaron a importancia de fomentar o empredemento e de estreitar a relación entre a Universidade e a súa contorna social e empresarial. A vicerreitora de Estudantes, Dolores González, foi a encargada de dar a coñecer os premiados, e quixo aproveitar para facer balance. Apuntou que dende 2011 o proxecto foi crecendo e consolidándose ata estar presente nos tres campus cun programa permanente de titorización e formación. “Emprender é difícil, laborioso e incerto, por iso vos felicitamos, aos máis de 100 alumnos e alumnas que participaron nas sete edicións, algúns deles xa vivindo da súa empresa como Monet, Robotilab, Meigalabas, Micogalicia, etc.” recordaba.

Deporte, tecnoloxía, enerxía, promoción cultural... seis novas ideas para Vigo

“A idea xurde da paixón polo deporte. Dende pequeno soñei con ter a miña propia tenda dedicada ao baloncesto e creo que chegou o momento de facelo realidade”. Así describe Santiago Rúa, do Grao en Administración e Dirección de Empresas, Last Pick, unha idea de negocio que consiste na posta en marcha dunha tenda en liña de zapatillas e produtos relacionados co baloncesto. É un dos seis novos inquilinos das preincubadoras do campus de Vigo.

Desde a Escola de Enxeñería Industrial chega a idea de Comprimir para Vivir, un proxecto que se basea no almacenamento de enerxía por medio de aire comprimido. “Utilizamos calquera tipo de enerxías renovables, adaptando o noso sistema á contorna onde se instala. Deste xeito, conseguimos eliminar a contaminación producida polos sistemas actuais de xeración e almacenamento eléctrico”, explica o seu impulsor, Ignacio Moreno. Vencellada ao traballo dun grupo multidisciplinar de estudantes de Bioloxía e Enxeñaría Industrial Eva López propón lanzar Afouteza de Galicia, unha empresa que pon sobre a mesa a creación dunha planta de compostaxe que aposte pola transformación dos residuos forestais en compós ecolóxico.

No caso de Galicia Postal é un proxecto de promoción cultural e lingüística que nace no ano 2014 como Traballo Fin de Mestrado en Dirección de Arte Publicitaria. “Crearemos unha serie de selos e postais, nas que se utilizaran palabras propias do galego, acompañadas, ademais, por unha representación gráfica do seu significado”, explica o seu promotor, José Francisco Muíño. Tamén da man dun alumno de mestrado, neste caso o de Xeoinformática, chega a proposta de PER Platform Education Researh, unha plataforma de servizos destinada a que os profesores de ensino secundario poidan empregala tanto para compartir recursos educativos como apoio do traballo diario. E, xa por último, Apptobus, de Adrián Gesteira, da EEI, que formula a idea dunha aplicación para atopar transporte interurbano de xeito fácil e rápido.

Xestión forestal, cultural, social... cinco novos proxectos para Ourense e Pontevedra

Os niños da incubadora da Tecnópole en Ourense acollerán este ano tres proxectos gañadores do Premios Incuvi-Emprende: Aprovechamiento de los recursos forestales, Biolux e ReivindicARTE, tres iniciativas que chegan da man de estudantes da Escola de Enxeñería Industrial e as facultade de Ciencias da Educación e de Ciencias. No primeiro caso, impulsada por Juan José Gil, o proxecto de negocio consiste no aproveitamento e recuperación de terreos forestais, concretamente soutos de castiñeiros e carballos do medio rural galego e na produción agropecuaria a partir deles con criterios ecolóxicos.
ReinvindicARTE é unha iniciativa que combina a xestión cultural e a intervención social. “O noso proxecto quere, por un lado, enxalzar o valor daquelas artistas aínda descoñecidas en Galicia e, por outro, difundir o seu traballo na sociedade actual”, explicou a súa promotora, Violeta Pérez. O terceiro inquilino, Biolux, suxire a creación dun modelo de negocio que desenvolve e comercializa un novo prototipo de boia, incorporando a este microorganismos bioluminiscentes.

Este ano os proxectos gañadores no campus de Pontevedra están bautizados como Lira Tenue e ByGymApp e volverán instalarse nas instalacións de AJE Pontevedra. Lira Tenue é un proxecto que consiste na creación dunha marca téxtil de panos e fulares para mulleres e homes que xurde do interese do seu impulsor, Ángel Manuel Bonet, egresado en Publicidade e Relacións Públicas, polo deseño gráfico e a moda. ByGymApp, impulsada por Vladislav Shvets, da Facultade de Ciencias da Educación e do Deporte, busca crear unha plataforma dixital que sirva para reservar o dereito de uso das instalacións deportivas ou clases dirixidas dos ximnasios.

Ouvir e Mediación Móvil, premios Avanza

Neste acto entregáronse tamén os premios Incuvi-Avanza, uns galardóns que pretenden apoiar os proxectos emprendedores da edición anterior que teñen potencial e viabilidade para poder continuar co seu desenvolvemento. Os gañadores recibirán 3000 euros e o asesoramento dun equipo de profesionais que mentorizarán os proxectos durante o ano que estean nos espazos de Porto do Molle e no CITI de Ourense. Nesta terceira convocatoria o xurado elixiu Mediación Móvil no campus de Vigo e Ouvir no de Ourense. O proxecto ourensán céntranse en xerar unha acción transformadora para as persoas con diversidade funcional de todo tipo ofrecendo asistencia persoal. No caso de Mediación Móvil, que realizaron o seu ano de pre-incubación no campus de Pontevedra, crean unha aplicación móbil e unha web para ofrecer un servizo de mediación para empresas, organizacións e particulares que precisen resolver conflitos. A impulsora de Ouvir xunto cos representantes de Mediación Móvil agradeceron o apoio, acompañamento e ánimo recibidos nun ano de incubación e aconsellaron aos novos galardoados “aproveitar o tempo, porque pasa moi rápido, seguir adiante porque é o voso presente e futuro”.

Reitoría | Campus Universitario | C.P. 36.310 Vigo (Pontevedra) | España | Tlf: +34 986 812 000 | informacion@uvigo.es            Accesibilidade | Mapa web | Aviso Legal