Campus de Vigo

luns 20 de novembro de 2017

Con entrada de balde, a cita será do 22 ao 24 de novembro no Teatro Afundación

Os documentais 'Mareas Vermellas' e 'O descoñecido mundo dos signátidos' son os grandes reclamos da programación

José Luis González, Mª Teresa Fernández e Manuel J. Fernández Iglesias na presentación

É unha das grandes citas da programación cultural de outono e este ano, no que acada xa a súa XXVII edición, a Semana de Cine Submarino cede todo o protagonismo aos grandes tesouros do mar galego. A cita será do 22 ao 24 de novembro, pero hoxe os seus organizadores, avanzaron os detalles dunha edición na que os grandes protagonistas son os documentais galegos Mareas Vermellas, de Manuel E. Garci e Jorge H. Urcera; e SyngDoc: o descoñecido mundo dos signátidos, un traballo asinado por Miquel Planas e no que se desvelan os principais segredos do día a día dos cabaliños de mar.

luns 20 de novembro de 2017

David Posada repite por 17º ano consecutivo no listado internacional 'Highly Cited Researchers'

O catedrático pasou de traballar no ámbito da Bioloxía Evolutiva a estudar o cancro

David Posada no seu despacho

Por decimo sétimo ano consecutivo, o catedrático da Universidade de Vigo David Posada confírmase como un dos investigadores máis citados do mundo. Así o reflicte o Highly Cited Researchers 2017 Clarivate Analytics, o listado anual que inclúe ás e aos principais investigadores das ciencias e ciencias sociais de todo o mundo con máis citas, no período comprendido entre os anos 2005 e 2015. En total son arredor de 3400 as e os investigadores de todo o mundo que aparecen na lista deste ano, elaborada a partir dos artigos que están entre o 1% dos máis citados por campo e ano, os denominados highly cited papers, publicados en revistas científicas e de ciencias sociais indexadas na web Science Core Collection

luns 20 de novembro de 2017

Organizado pola Área de Formación e Innovación Educativa

Será os días 23 e 24 deste mes na Facultade de Ciencias Económicas e Empresariais

Ángela Arias e Roberto Baelo, docentes do curso

Dende sempre, un dos aspectos que xeran maior preocupación no contexto educativo é o desenvolvemento académico e persoal do alumnado, tamén na Universidade. Este é un dos motivos polos que a Área de Formación e Innovación Académica lanzou este cuadrimestre o curso Iniciación ao coaching educativo na contorna universitaria, que se impartirá entre o 23 e o 24 de novembro, en horario de tarde, no salón de graos da Facultade de Ciencias Económicas e Empresariais. A resposta do Persoal Docente e Investigador da Universidade non se fixo esperar, e aos poucos días de abrirse a matrícula o número de solicitudes -45- duplicou o de prazas ofertadas -20-. 

venres 17 de novembro de 2017

Ao abeiro do proxecto Marisco, financiado con preto de 150.000 euros

O estudo está centrado nos bancos marisqueiros de Redondela, Campelo, Carril e Cambados

Imaxe dun dos experimentos de campo  Foto: E. Vázquez Otero

Como responden ameixas e berberechos a eventos meteorolóxicos estremos como choivas torrenciais ou ondas de calor? Esta é a pregunta a que trata de dar resposta a investigadora do Centro de Investigación Mariña da Universidade de Vigo Rula Domínguez na súa tese de doutoramento, investigación que está a realizar ao abeiro do proxecto Marisco - Bancos de marisqueo en Galicia: prevención de riegos producidos por eventos extremos sobre especies comercialmente importantes-, financiado con preto de 150.000 euros e que ten como principal obxectivo estudar os efectos deste tipo de eventos sobre as capturas de ameixa e berberecho durante os últimos 20 anos.

venres 17 de novembro de 2017

As estudantes Lidia Cruces e Victoria Gil son as súas autoras

O obxectivo dos galardóns do Ministerio de Educación é fomentar o espírito investigador no alumnado

O obxectivo dos galardóns do Ministerio de Educación é fomentar o espírito investigador no alumnado

Cada ano, o Ministerio de Educación, Cultura e Deporte convoca o Certame Arquímedes co obxectivo de fomentar o espírito investigador no alumnado universitario mediante a concesión de premios aos mellores traballos de investigación. Entre os galardoados na edición 2017 do concurso están dous traballos fin de grao realizados na Universidade de Vigo. Lidia Cruces, da Facultade de Ciencias Económicas e Empresariais do campus de Vigo, acadou un segundo premio polo seu estudo sobre a sustentabilidade do sistema de pensións, e Victoria Gil, da Facultade de Dereito do campus de Ourense, conseguiu na mesma categoría un accésit pola súa investigación sobre a discriminación no traballo por embarazo ou maternidade.

venres 17 de novembro de 2017

Coordinados por Elena Ojea, investigadora cunha Starting Grant do European Research Council

Terán lugar, cando menos, unha vez ao mes na Facultade de Ciencias Económicas e Empresariais

Intervención de Eduardo Sánchez, primeiro investigador en participar no ciclo

Intercambiar coñecementos entre persoas que estudan e traballan desde diferentes ámbitos o mundo da pesca e aprender desta interacción. Este é o obxectivo co que esta semana arrancou na Facultade de Ciencias Económicas e Empresarias un ciclo de seminarios científicos centrados no sector pesqueiro e o ámbito mariño, unha iniciativa que nace como un proxecto conxunto da agrupación estratéxica Ecobas (Economics and Business Administration for Society) e Campus do Mar.

venres 17 de novembro de 2017

A banda galega achegou ao Vidal Bolaño música contemporánea con trazas das cantigas de Martin Codax

A banda galega achegou ao Vidal Bolaño música contemporánea con trazas das cantigas de Martin Codax

Co Pergamiño Vindel exposto en Vigo dende o pasado mes, retornando así ás beiras da ría que o viu nacer, a programación cultural do segundo cuadrimestre da Universidade non podía senón empaparse da lírica medieval. Este xoves foi a banda galega ISGA Collective a encargada de achegar ao Teatro Vidal Bolaño de Cidade Universitaria a súa proposta que mestura a música galega de vangarda coa lírica medieval.

xoves 16 de novembro de 2017

Ceferino de Blas abordou nos Xoves do Vindel a divulgación xornalística do trobador e a súa obra

Destacou o labor do arqueólogo Oviedo y Arce e dos escritores Vesteiro Torres, Rodríguez Elías e Álvarez Blázquez

Ceferino de Blas abordou o tratamento que os xornais deron á figura de Codax e a súa obra

Sete séculos tivo que agardar Martin Codax para que a súa figura e a súa obra tivesen difusión a través dos xornais e dos libros, concretamente ata o 7 de xuño de 1876, cando o escritor vigués Teodosio Vesteiro Torres publicou no xornal ourensán El Heraldo Gallego a primeira noticia que daba conta do achado dun poeta do medievo, cuxo tema central era a ría de Vigo. O traballo de Vesteiro Torres viu a luz meses despois de que Ernesto Monaci editara o Cancioneiro da Biblioteca Vaticana.

xoves 16 de novembro de 2017

O acto contou coa participación do prestixioso científico Ángel Carracedo

A entrega de premios e a conferencia clausuraron unha intensa semana de actividades culturais

Foto de familia dos premiados con Ángel Carracedo e David Posada

A imaxe dunha marmota bocexando en plena mañá nos Pireneos aragoneses foi a que cativou ao xurado do 14º Concurso de Fotografía Biolóxica, unha das actividades que, ano a ano, protagoniza as celebracións de San Alberte, patrón da Facultade de Bioloxía. A entrega de premios, deste concurso e tamén do de Debuxo Biolóxico, puxo o punto e final a unha semana na que se celebraron múltiples actividades culturais, incluíndo unha exposición de cogomelos e varias conferencias, a última esta mesma mañá e que trouxo ata o campus ao prestixioso científico Ángel Carracedo.

xoves 16 de novembro de 2017

Empresarios, investigadores, políticos e xornalistas participan nunha xuntanza en Baiona

O ministro de Economía de Portugal analizou, na conferencia inaugural, a evolución económica do seu país

Empresarios, investigadores, políticos e xornalistas participan nunha xuntanza en Baiona

Diálogos España–Portugal é unha iniciativa organizada polo Foro Económico de Galicia e patrocinada polo Consorcio da Zona Franca de Vigo e pola consultora EY que nace coa intención de converterse nun punto encontro do tecido empresarial, político, académico e social para debater sobre os desafíos económicos de ambos países. A primeira edición deste evento celébrase este xoves no Parador de Baiona e conta coa participación, entre doutros, do ministro de Economía da República Portuguesa, Manuel Caldeira Cabral, e da secretaria de Estado de Economía do Goberno español, Irene Garrido.

Seguinte | Última

1 de 500

Reitoría | Campus Universitario | C.P. 36.310 Vigo (Pontevedra) | España | Tlf: +34 986 812 000 | informacion@uvigo.es            Accesibilidade | Mapa web | Aviso Legal