Campus de Pontevedra

mércores 18 de abril de 2018

Emilio Fernández e Pachi Reigosa debateron durante máis de dúas horas na Facultade de Fisioterapia

Os candidatos a reitor defenden en Pontevedra a súa idea de Universidade no último debate electoral

Os líderes de Ideas que suman e Horizonte 2040 estiveron acompañados dos candidatos á vicerreitoría do campus

Emilio Fernández e Pachi Reigosa debateron durante máis de dúas horas na Facultade de Fisioterapia

Na xornada previa ao peche da campaña ás eleccións á Reitoría do vindeiro luns 23, o campus de Pontevedra acolleu o terceiro dos debates nos que os candidatos Emilio Fernández, de Ideas que suman, e Pachi Reigosa, de Horizonte 2040, expuxeron as súas propostas e visións sobre o futuro da Universidade de Vigo. Nun debate que congregou a profesorado, persoal de administración e servizos e alumnado na Facultade de Fisioterapia, Reigosa e Fernández estiveron acompañados polos membros do seu equipo propostos para ocupar a Vicerreitoría do campus, Jorge Soto, no caso de Horizonte 2040, e Juan Manuel Corbacho, de Ideas que suman, que se sumaron ao segundo bloque do debate.

mércores 18 de abril de 2018

Nas Xornadas Internacionais de Comunicación Institucional e Imaxe Pública, inauguradas este mércores

Máis de 230 estudantes fórmanse nas claves da linguaxe simbólica do poder

Preto de 20 expertos e expertas participan na 18 edición deste curso en CCSS e da Comunicación

Leal, Baamonde, Santalices e Ramos, no acto inaugural

Con 237 alumnos inscritos e inscritas, o XVIII Curso Complementario de Comunicación e Protocolo-VII Xornadas de Comunicación Institucional e Imaxe Pública abríronse na mañá deste mércores na Facultade de Ciencias Sociais e da Comunicación co propósito de promover unha reflexión “con carácter científico e crítico” dunha disciplina que se centra na “linguaxe simbólica do poder, da cortesía e da organización”, como salientou Fernando Ramos, director das xornadas. Preto de 20 especialistas e profesionais protagonizarán as diferentes conferencias do que é “o curso máis antigo da Universidade, que se vén celebrando sen solución de continuidade desde hai 18 anos e tamén o que acada máis alumnado”.

martes 17 de abril de 2018

CCSS e da Comunicación acolle unha exposición integrada na Semana da Creatividade e da Innovación

Os produtos innovadores ideados por 150 estudantes, en 30 carteis

Unha xornada inserida tamén no programa da semana abordou co PDI o potencial de transferencia do campus

CCSS e da Comunicación acolle unha exposición integrada na Semana da Creatividade e da Innovación

Unha maleta intelixente, un armario electrónico, unha aplicación móbil que compara prezos de supermercados ou un clasificador intelixente do lixo. Son catro das 30 ideas de innovación de produtos que se plasman nos carteis que integran a exposición Talento creativo e innovador, que desde este martes preside a cristaleira do comedor da Facultade de Ciencias Sociais e da Comunicación. Inserida no programa de actividades da Semana Internacional da Creatividade e da Innovación, a exposición mostra os resultados do traballo que 150 estudantes dos tres graos que se imparten no centro.

martes 17 de abril de 2018

A candidatura celebrou reunións con PAS, PDI e alumnado en Belas Artes e na EE Forestal

Ideas que suman achega as súas propostas ao campus pontevedrés

Emilio Fernández estivo acompañado nestes encontros polo candidato a vicerreitor Juan Manuel Corbacho

Un intre da reunión mantida co PDI en Belas Artes

A campaña ás eleccións á reitoría do vindeiro luns 23 de abril encara xa a súa semana final con actos como os que este martes desenvolveu no campus pontevedrés a candidatura Ideas que Suman. O candidato a reitor Emilio Fernández iniciou en Belas Artes unha serie de xuntanzas co persoal de administración e servizos, persoal docente e alumnado dos diferentes centros, que posteriormente continuou na EE Forestal. Acompañado polo candidato a vicerreitor de campus, Juan Manuel Corbacho, Fernández presentou as liñas centrais do seu programa nunha serie de encontros que o mércores continúa en Ciencias da Educación e do Deporte e Ciencias Sociais e da Comunicación.

luns 16 de abril de 2018

Profesorado turco e polaco participa, do 24 a 26 de abril, na International Week desta facultade

CCSS e da Comunicación dótase dunha semana internacional

A iniciativa insírese no plan de internacionalización do grao en Dirección e Xestión Pública

Profesorado turco e polaco participa, do 24 a 26 de abril, na International Week desta facultade

O pasado venres, a Facultade de Ciencias Empresariais e Turismo do campus de Ourense celebraba a clausura da súa xa tradicional International Week, unha semana que permite ao seu alumnado compartir actividades académicas e culturais con estudantes e profesorado estranxeiro. Con este evento como exemplo e como unha das medidas inseridas no plan de internacionalización do grao en Dirección e Xestión Pública, a Facultade de Ciencias Sociais e da Comunicación impulsa neste mes de abril a súa propia International Week.

luns 16 de abril de 2018

Pontevedra acolle unha serie de actividades articuladas en torno ao Campus Crea S2i

Igualdade e sustentabilidade para dar inicio á Semana Internacional da Creatividade e da Innovación

A Casa das Campás acolle desde este luns a exposición ‘Achegas das mulleres á sustentabilidade do mar’

A Casa das Campás acolle desde este luns a exposición 'Achegas das mulleres á sustentabilidade do mar'

O campus de Pontevedra inicia este luns un amplo programa de actividades articulado en torno aos dous piares do seu proxecto de especialización, Crea S2I, a creatividade e a innovación social e sustentable, fío de unión das preto de vinte propostas que integran o programa impulsado pola Vicerreitoría do campus coa colaboración das diferentes facultades e escolas. A Semana Internacional da Creatividade e da Innovación deu comezo na mañá deste luns coa apertura da exposición Achegas das mulleres á sustentabilidade do mar, primeiro acto dun programa que aglutina conferencias, actividades culturais, obradoiros e sesións de traballo dirixidas ao persoal docente e investigador.

luns 16 de abril de 2018

O equipo universitario logrou fronte ao Padrón-A o seu sexto triunfo consecutivo

Diminúen as opcións de revalidar o título para o EXP-UVigo a pesares dunha nova vitoria

A súa vitoria pola mínima fai que aumente a distancia respecto do líder, o USC

Miguel Senlle logrou o único triunfo visitante no seu enfrontamento con Pablo Espiñeira

O Escola de Xadrez Pontevedra-Universidade de Vigo-Estratexia pola Paz sumou esta fin de semana na casa do Padrón-A unha nova vitoria na División de Honra do xadrez galego, a sexta que suma de xeito consecutivo. Mais fíxoo nunha xornada na que viu como se reducían as súas posibilidades de repetir o título logrado a pasada tempada, xa ao que o seu triunfo pola mínima fronte ao conxunto padronés (2,5-3,5) sumouse a ampla vitoria acadada polo líder da categoría, o USC (5,5-0,5), o que deixa aos pontevedreses a catro puntos do primeiro posto na semana previa ao seu enfrontamento directo.

venres 13 de abril de 2018

O centro acolle deste este venres un curso sobre o tratamento da síndrome da dor miofascial

Estudantes e profesionais afondan en Fisioterapia na detección dos puntos de orixe da dor

Coas súas 24 prazas cubertas, este seminario é impartido polo fisioterapeuta Guillermo Bilbao

O centro acolle deste este venres un curso sobre o tratamento da síndrome da dor miofascial

Aprender a detectar e actuar sobre os chamados puntos gatillo, as zonas de máxima tensión dun músculo que en ocasións son tamén o foco de orixe de diversas molestias no sistema musculo-esquelético, próximas ou non a ese punto, é o propósito central dun curso que desde a tarde deste venres reúne a 24 estudantes e profesionais na Facultade de Fisioterapia. Dirixido polo profesor Gustavo Rodríguez e impartido polo fisioterapeuta Guillermo Bilbao, o IV Curso sobre tratamento conservador da síndrome miofascial desenvólvese neste centro nas xornadas de venres, sábado e domingo.

 

venres 13 de abril de 2018

O director da EE Forestal, Juan Picos, participa na reunión dun proxecto europeo sobre perigos naturais

As zonas queimadas son “máis sensibles a sufrir un novo e máis intenso incendio pasados uns anos”

O investigador abordou no encontro do proxecto 'Net Risk Work' a problemática dos lumes no noroeste peninsular

Juan Picos, durante a súa conferencia nesta reunión de traballo

Incendios forestais, tormentas, inundacións e avalanchas de neve. Estes son os catro focos de análise da segunda reunión de traballo sobre xestión de perigos naturais do proxecto Net Risk Work, fundado polo EU Civil Protection Mechanism que desde este mércores se celebra en Cerdeña. Especialistas na materia e responsables de diferentes servizos de emerxencias participan nestes días nun workshop ao que o director da Escola de Enxeñaría Forestal, Juan Picos, foi convidado para falar da problemática social que implican os lumes forestais no noroeste da península.

venres 13 de abril de 2018

Preto de 30 estudantes desta titulación visitaron o Valedor do Pobo e o Parlamento

Alumnado de Dirección e Xestión Pública achégase ao día a día das institucións autonómicas

Na cámara, mantiveron un coloquio con deputados de tres grupos parlamentarios

O alumnado, no hemiciclo da cámara autonómica. Foto: Parlamento de Galicia

Coñecer as funcións e o funcionamento das principais institucións da comunidade autónoma é un dos obxectivos da materia Sistema político español e galego, do grao en Dirección e Xestión Pública. Por iso entre os seus contidos figura cada ano a visita que preto de 30 alumnos e alumnas veñen de realizar, xunto co profesor da materia, Álvaro Xosé López Mira, tanto ao Parlamento de Galicia como a sede do Valedor do Pobo. Na cámara autonómica, o estudantado puido intercambiar impresións con deputados de tres dos grupos parlamentares nun coloquio no propio hemiciclo.

Reitoría | Campus Universitario | C.P. 36.310 Vigo (Pontevedra) | España | Tlf: +34 986 812 000 | informacion@uvigo.es            Accesibilidade | Mapa web | Aviso Legal