Campus de Pontevedra

venres 17 de novembro de 2017

Coas xornadas internacionais que desenvolverá o 4 e 5 de decembro na Casa das Campás

Conferencias, exposicións e unha representación teatral integran un programa aberto ao público

As II Xornadas Internacionais José Saramago desenvolveranse en Pontevedra os días 4 e 5 de decembro

“A obra de Saramago caracterízase por unha íntima relación entre música, arte, literatura e un importante pulso sociopolítico”, salienta director da Cátedra José Saramago da Universidade, Burghard Baltrusch. De aí que comunicación, arte e política sexan tres dos aspectos a abordar na segunda edición das xornadas internacionais que esta cátedra dedica ao Nobel portugués e que, neste 2017, se achegan ata Pontevedra. Once conferencias e comunicacións, a exposición de traballos feitos polo alumnado e unha representación teatral integran o programa do evento que terá lugar na Casa das Campás.

venres 17 de novembro de 2017

A Sala X acolle deste este venres unha escolma das máis de 600 obras que reuniu este evento internacional

A mostra que poderá visitarse ata o 17 de decembro reúne os traballos de artistas de oito países

A Sala X acolle deste este venres unha escolma das máis de 600 obras que reuniu este evento internacional

A piques de cumprir 40 anos, a Bienal Internacional de Arte de Cerveira reuniu o pasado verán na localidade lusa de Vila Nova de Cerveira máis de 600 obras de preto de 500 artistas de 35 países. Con estas cifras como bagaxe e co propósito de defender a creación artística como medio de comunicación intercultural, a Fundación Bienal de Arte de Cerveira achega á Sala X unha escolma das obras presentes na súa décimo novena edición, nunha exposición que poderá visitarse ata o 17 de decembro, que reúne as creacións de 24 artistas de oito países.

xoves 16 de novembro de 2017

A través dun convenio polo que a institución provincial destina 60.000 euros a esta iniciativa

O proxecto abrangue tamén o estudo do ciclo biolóxico e a definición de pautas de detección temperá dos niños

Garrido, Mato, Silva e Calviño, durante a sinatura do convenio

O campus de Vigo contará cunha estación experimental, pioneira en Europa, para o estudo da Vespa velutina, unha iniciativa pioneira que xorde do convenio de colaboración que a institución académica asinaba este xoves coa Deputación de Pontevedra, que destinará 60.000 euros a unha investigación coordinada polas profesoras do Departamento de Ecoloxía e Bioloxía Animal Josefina Garrido e María Calviño. O proxecto abrangue así mesmo o estudo do ciclo biolóxico desta especie e o seu comportamento nesta zona, o que permitirá, como salientou o reitor, Salustiano Mato, definir unha serie de pautas que permitan a detección temperá dos seus niños e medidas que “sirvan para atenuar os efectos negativos desta especie invasora”.

xoves 16 de novembro de 2017

O Pavillón Universitario acolle, os días 14 e 17, o Maratón de Zumba e o Crossfit Solidario

Os dous eventos permitirán reunir alimentos e fondos para organizacións humanitarias

O Maratón de Zumba Solidario terá lugar o 14 de decembro

Deporte e solidariedade camiñarán da man, un ano máis, nos eventos que a Área de Benestar, Saúde e Deporte da Universidade prepara para as datas previas ao Nadal. Os días 14 e 17 de decembro, o Pavillón Universitario será escenario dun maratón de zumba e dunha competición de crossfit solidarias, dirixidas tanto a comunidade universitaria como ao conxunto da cidadanía. No caso do Maratón de Zumba Solidario, o obxectivo é reunir alimentos para o comedor dos Pais Franciscanos, mentres que Crossfit Solidario combinará a doazón da cota de inscrición coa recollida de alimentos, roupa e xoguetes.

mércores 15 de novembro de 2017

As curtas ‘Matria’, ‘Aadat’ e ‘Share o no share’ centraron a primeira sesión desta máster class

A proxección completouse cun coloquio cos realizadores Álvaro Gago, Juan Hervella e Xisela Franco

Ramahí, Hervella, Gago e Franco

Curtas nas marxes é o título da sesión coa que, na tarde deste mércores, botou a andar a sétima edición de Augal, dedicada a achegar ao alumnado de Ciencias Sociais e da Comunicación tres estilos e tres experiencias profesionais dispares dentro do mundo das curtametraxes. Nunha sesión presentada pola profesora Diana Ramahí, os máis de 50 inscritos neste curso puideron intercambiar impresións con Xisela Franco, directora de Aadat, unha curta rodada nos campamentos de refuxiados de Tindouf; o ex-alumno Álvaro Gago, autor de Matria, premiada na Seminci de Valladolid; e Juan Hervella, responsable de Share o no share.

mércores 15 de novembro de 2017

15 novas tituladas e titulados exhibirán o xoves 23 nesta pasarela os seus proxectos de fin de estudos

O desfile verase complementado cun programa de talleres e conferencias ao longo da vindeira semana

O programa de Debut 2017 presentouse na Casa das Campás

Como unha “plataforma de visibilidade” para os novos titulados e tituladas, “que lles servise para mostrar o que están facendo e tamén como unha primeira ponte entre a vida académica e a vida laboral”, naceu hai doce anos, como lembra a directora de Esdemga, Lola Dopico, Debut, o desfile que o vindeiro xoves 23 de novembro porá baixo os focos do Pazo da Cultura os traballos de 70 estudantes e titulados. 15 egresadas e egresados estrearán as coleccións que constitúen os seus proxectos de fin de estudos nun desfile que se complementará coa presentación dunha serie de traballos realizados, no marco da actividade académica, por máis de 50 alumnos e alumnas dos diferentes cursos da titulación.

martes 14 de novembro de 2017

Alumnado e profesorado do campus participa na EE Forestal nun curso de formación en igualdade

Froito dun convenio entre Universidade e Deputación, desenvolve neste cuadrimestre o seu primeiro módulo

O curso desenvólvese na EE Forestal

“Os estereotipos de xénero inflúen en todas as facetas da vida, vanse transmitindo a través das familias, dos medios de comunicación, da propia escola... e moitas veces non es consciente de que estás asumindo un papel que non che corresponde bioloxicamente”, salienta a investigadora María Lorenzo, unha das docentes do curso de formación en igualdade que, ao abeiro dun convenio asinado entre a Universidade de Vigo e a Deputación de Pontevedra, forma nestas semanas no campus a alumnado e profesorado na detección e o combate da desigualdade de xénero nas aulas.

martes 14 de novembro de 2017

A través dun obradoiro impartido polo egresado Carlos Seijo, do estudo Maxina

En dúas sesións puideron achegarse a campos como a realidade aumentada ou os contidos ‘real time’

O alumnado puido probar o casco HTC Vive

Camiñar polo estudio de Francis Bacon sen saír da facultade. Esta foi unha das experiencias que este martes puido vivir o alumnado de Belas Artes no marco dun obradoiro sobre vídeo 360 e realidade virtual impartido polo egresado e director do estudo Máxima, Carlos Seijo. A creación de contidos 3D, de realidade aumentada, o vídeo e a fotografía esféricas ou, neste caso, os contidos real time, que permiten a través dun casco desprazarse por un espazo tridimensional como o estudo de Bacon, que esta produtora recreou para o Guggenheim, foron algúns dos contidos abordados no taller.

luns 13 de novembro de 2017

Un libro recolle os programas realizados polo grupo GIES-10 con persoas con cancro ou autismo

Coordinado pola profesora Margarita Pino, o volume pon o acento nos métodos de avaliación das actividades

Investigadoras e investigadores do grupo GIES10. De pé, Portela, Bouzo, Fernández, García, Reguera e Giráldez. Sentados, López Castedo, Pino e Gutiérrez

Programas que promoven un uso terapéutico do teatro con vítimas da violencia machista e persoas con problemas de saúde mental, proxectos de intervención que empregan a expresión corporal con mulleres con cancro e a ximnasia para mellorar habilidades sociais, xunto con programas educativos que empregan a actividade física con nenos con necesidades de apoio educativo, a equitación con persoas con autismo e a hixiene postural con traballadores. Estes sete exemplos das liñas de investigación e intervención desenvolvidas polas investigadoras e investigadores do grupo GIES-10, de Ciencias da Educación e do Deporte, recóllense no libro Diseño y evaluación de programas educativos en el ámbito social.

venres 10 de novembro de 2017

Nenas e nenos puideron degustar estes froitos no magosto celebrado no centro

No marco das actividades vinculadas a esta estación desenvolvidas nas últimas semanas

Nenas e nenos puideron degustar estes froitos no magosto celebrado no centro

Como colofón a unhas xornadas na que o outono constituíu o eixo das actividades que se desenvolven nas súas aulas, a celebración e o recendo a castañas marcaron este venres na Escola Infantil do campus. Coa colaboración das familias e do servizo de cociña do centro, nenos e nenas puideron degustar nesta xornada os froitos máis populares do outono, nun magosto no que a degustación de castañas asadas e cocidas se completou con música e xogos. “É unha actividade que facemos todos os anos, porque os magostos son unha das tradicións máis típicas desta época”, salienta a directora do centro.

Seguinte | Última

1 de 325

Reitoría | Campus Universitario | C.P. 36.310 Vigo (Pontevedra) | España | Tlf: +34 986 812 000 | informacion@uvigo.es            Accesibilidade | Mapa web | Aviso Legal