Actividades Académicas

mércores 30 de xaneiro de 2008

Un curso on-line ofrece formación en xestión e produción de radio universitaria

Dirixido a gabinetes de prensa e servizos de comunicación


O 5 de marzo é a data prevista para o inicio da terceira edición do curso que a Universidade Jaume I de Castellón pon en marcha co obxectivo de formar ao persoal dos gabinetes de prensa e servizos de comunicación das universidades españolas, así como a titulados con experiencia no ámbito, en temas de xestión e produción do medio radiofónico.

martes 29 de xaneiro de 2008

Nun curso promovido pola Área de Innovación Educativa

O docentes actualizan os seus coñecementos sobre os orzamentos do Estado e da Xunta

O curso Novidades Lexislativas nos Orzamentos do Estado e da Xunta de Galicia enmárcase dentro das accións formativas institucionais da Universidade que organiza a Vicerreitoría de Formación e Innovación Educativa. A través da Área de Innovación Educativa, o obxectivo do devandito curso é que os docentes acaden un coñecemento teórico- práctico dos principais cambios para o ano 2008 en materia fiscal e de orzamentos en Galicia e en España.

martes 29 de xaneiro de 2008

Do 7 ao 21 de febreiro

Os profesores do campus aprenderán a usar os “blogs” como ferramenta docente

O curso será impartido por Daniel Martí

Cada vez son máis os membros da comunidade universitaria que usan para o seu labor diario as novas ferramentas que proporciona internet como é o caso dos blogs ou weblogs. Este é precisamente o caso de Daniel Martí Pellón, un dos pioneiros en utilizar os espazos da rede como unha ferramenta de apoio ás súas clases e, pouco a pouco, estase a converter nunha práctica de ensino diferente. Tal como explica Daniel Martí, “non se pode ser profesor sen estar en internet”, o mesmo argumento que levou á Vicerreitoría de Formación e Innovación Educativa a crear un curso dentro do programa de Formación Permanente do Profesorado, co obxectivo de ofrecer as experiencias e consellos máis comúns para unha sinxela e útil instalación dun blog persoal de uso docente.

venres 25 de xaneiro de 2008

Co gallo dun concurso organizado polos docentes

Robots creados polos alumnos desfilan polos corredores da ETS de Enxeñeiros Industriais

Co obxectivo de aprender xogando, os profesores da ETS de Enxeñeiros Industriais Rafael Sanz e Enrique Paz organizan, dentro da materia que imparten, o concurso Robots Móbiles. A experiencia, que botou a andar no 2000, conta cunha gran aceptación entre os estudantes, posto que, tal como comenta Antonio Díez, un dos alumnos, “tendo en conta que se trata dun traballo voluntario, é destacable que preto do 90% da clase estea integrado nalgún dos dez grupos participantes”.

venres 25 de xaneiro de 2008

O decano de Ciencias da Educación despide aos estudantes Erasmus do seu centro cunha cea de confraternidade

Os alumnos salientaron a boa acollida que tiveron e a implicación dos profesores

Co cuadrimestre a piques de rematar termina tamén a estadía dalgúns Erasmus no campus. Para despedir aos sete alumnos italianos, brasileiros e portugueses que acolleu a Facultade de Ciencias da Educación, o seu decano e coordinador, Xosé Manuel Cid, convidounos a unha cea de confraternidade á que tamén acudiron Ana Méndez, profesora de Educación Social, e Marta Súarez, responsable de ORI. No que definiu como “o noso ano máis internacional” Cid salientou a amizade que xurdiu entre o grupo, “outros anos nin chegamos a coñecer case aos Erasmus pero estes pasaron moitas veces polo decanato e establecemos unha relación especial, fixemos moitas cousas xuntos” explicou.

xoves 24 de xaneiro de 2008

I Curso complementario de vendaxes neuromusculares

24 profesionais especializaranse esta fin de semana na técnica da kinesiotaping

Terá lugar na Escola Universitaria de Fisioterapia

24 profesionais do sector da saúde especializaranse durante esta fin de semana na técnica da kinesiotaping, tamén denominada Medical Taping ou vendaxe neuromuscular, que está revolucionando a práctica diaria de moitos fisioterapeutas. Da man do profesor da Universidad de Castilla-La Mancha, José Manuel Fernández Rodríguez, e nas instalacións da Escola Universitaria de Fisioterapia do campus pontevedrés, formaranse nesta disciplina que está tendo unha gran aceptación e destacados resultados en todas as comunidades médicas internacionais.

xoves 24 de xaneiro de 2008

Celebrarase entre o 18 e o 22 de febreiro

A falta dun mes, hai xa máis de setecentos inscritos no "Forumemprego 2008"

A novidade desta sétima edición é a incorporación do campus de Pontevedra

Cerca de 1500 mozos participarán na sétima edición das Xornadas Universitarias de Emprego de Galicia e Norte de Portugal, Forumemprego 2008, que se desenvolverán nos tres campus da Universidade dende o 18 ata o 22 de febreiro. Esta iniciativa pretende ofrecer aos titulados universitarios un achegamento aos novos retos laborais como a mobilidade internacional, os recursos para a empregabilidade ou os procesos de selección. Para este ano presentouse como novidade a incorporación do campus de Pontevedra no programa de actividades. Tal e como explicou o seu vicerreitor, Jesús Hernández, “con motivo da descentralización dos campus e respondendo ao afán da Universidade de que os estudantes estean cada vez máis cerca das empresas, propúxose a participación de Pontevedra nesta iniciativa”, comentou na presentación. O evento contou tamén coa preseza do vicerreitor de Relacións Institucionais, Iván Area, o director xeral de Formación e Colocación da Xunta de Galicia, Pastor Fuenteseca e a conselleira Eures da Universidade, Emilia Seoane.

mércores 23 de xaneiro de 2008

Cunha charla da concelleira de Benestar Social, Margarita Castejón

Máis de 100 alumnos de Ciencias da Educación coñeceron o labor que desde o concello se fai en temas sociais


Os alumnos de primeiro curso das diplomaturas en Ciencias da Educación tanto na especialidade de primaria como na de musical, coñeceron esta semana o importante labor que desde o concello de Pontevedra se fai temas sociais. Ao longo de dúas xornadas, máis de 100 alumnos da Facultade de Ciencias da Educación e do Deporte do campus pontevedrés, escoitaron no salón de plenos da Casa Consistorial e da man da concelleira de Benestar Social, Margarita Castejón, unha extensa charla onde se amosaron todos os traballos que desde a administración se están facendo en materia de educación.

venres 18 de xaneiro de 2008

Segundo M. A. Zabalza, catedrático de Didáctica

Titorizacións individualizadas e manexo de novas tecnoloxías, claves para acadar unha docencia de calidade

O autor defende unha educación baseada na aprendizaxe, non no ensino

Para ser un bo docente non chega con ter capacidade de planificar o curso, seleccionar e presentar os contidos do xeito axeitado e explicalos de forma comprensible. É necesario ter capacidade de reflexión sobre o que se está a facer, manexar as novas tecnoloxías, ser capaz de traballar en equipo, ter boas relacións cos alumnos e facerlles un bo proceso de titorización. Estas son algunha das ideas que defendeu o catedrático de Didáctica Miguel Ángel Zabalza nunha conferencia na que abordou os novos retos que terá que afrontar a universidade para adaptarse aos novos tempos e, con el, ao EEES.O acto, encadrado dentro do ciclo A docencia universitaria, tivo lugar este venres na Facultade de Ciencias Xurídicas e do Traballo.

venres 18 de xaneiro de 2008

Tras a demanda por parte do alumnado

A biblioteca de Ciencias Sociais abrirá as fins de semana durante a época de exames

Esta será a primeira vez que a biblioteca central do campus de Pontevedra abrirá as súas portas as fins de semana durante a época de exames. Tras unha constante demanda por parte dos estudantes, este sábado 19 de xaneiro, será a primeira fin de semana en que os alumnos poderán acudir a este centro a estudar ou a consultar calquera información para preparar as evaluacións do primeiro cuadrimestre. Como explica a directora do centro, Laura González, “en Vigo xa fai dous anos que se empezaron a abrir as bibliotecas a fin de semana e xa entón había un interese por parte do alumnado en que se incluíran tamén nesta iniciativa aos outros dous campus” e engadiu que “Ourense empezou en xuño do 2007 e ao final acordaron incluír tamén a Pontevedra”.

Primeira | Anterior | Seguinte | Última

280 de 292

Reitoría | Campus Universitario | C.P. 36.310 Vigo (Pontevedra) | España | Tlf: +34 986 812 000 | informacion@uvigo.es            Accesibilidade | Mapa web | Aviso Legal